EasyJet bætir Birmingham við sem nýjum áfangastað á Keflavíkurflugvelli

Breska flugfélagið easyJet kynnti í dag áætlun sína fyrir veturinn 2024/2025. Félagið tilkynnti þá að byrjað yrði að fljúga milli Birmingham á Englandi og Keflavíkurflugvallar í fyrsta sinn í byrjun desember. Flogið verður tvisvar í viku þar á milli, þriðjudaga og laugardaga, fram í lok mars á næsta ári.

„Við á Keflavíkurflugvelli fögnum þeirri ákvörðun easyJet að bæta áttunda áfangastaðnum sínum við frá Keflavíkurflugvelli næsta vetur,“ segir Grétar Már Garðarsson, forstöðumaður flugfélaga og leiðaþróunar. „EasyJet er einni stærsti viðskiptavinur okkar. Þessi ákvörðun er enn eitt merki þess hversu mikla trú félagið hefur á áfangastaðnum Íslandi.“

Auk Birmingham býður easyJet upp á sjö aðra áfangastaði þaðan sem flogið er til Keflavíkurflugvallar. Það eru Bristol, Edinborg, London Gatwick, Luton, Manchester, Mílanó og Orly-flugvöllur í París. Ferðir milli Keflavíkurflugvallar og þessara áfangastaða samkvæmt vetraráætlun easyJet hefjast í byrjun október og er flogið fram í lok mars 2025.