Breið samstaða um samstarf í nýrri bæjarstjórn Grindavíkur
Oddvitar allra flokka í nýkjörinni bæjarstjórn Grindavíkur vinna nú sameiginlega að samfélagssáttmála um framtíð Grindavíkur og samstarfi á nýju kjörtímabili. Þetta kemur fram á vef bæjarfélagsins.
„Vilji allra bæjarfulltrúa stendur til þess að vinna saman að þeim krefjandi en jafnframt spennandi verkefnum sem fram undan eru og leggja grunn að áframhaldandi uppbyggingu samfélagsins í Grindavík,“ segir í frétt á grindavik.is.
Áhersla er lögð á samstöðu og ábyrgð á tímum þar sem mikið er í húfi fyrir Grindvíkinga og bæjarfélagið.
Gert er ráð fyrir að samstarfssamningur og frekari áherslur nýrrar bæjarstjórnar verði kynntar á næstu dögum.
Fyrsti fundur nýrrar bæjarstjórnar verður haldinn 2. júní næstkomandi.
