Bilun tafði útkall Hannesar Þ. Hafstein

Á ellefta tímanum í morgun barst útkall vegna vélarvana báts utan við Garðskaga. Rafmagnsbilun tafði brottför björgunarskipsins á leið í útkallið.

Áhöfn björgunarskipsins Hannes Þ. Hafstein brást skjótt við þegar útkall barst um vélarvana bát úti af Garðskaga um kl. 11 í morgun. Við undirbúning brottfarar kom þó í ljós bilun í rafbúnaði sem hafði tæmt rafgeyma skipsins og fóru vélar þess því ekki í gang. Vinna hófst þegar á staðnum við að bregðast við biluninni og koma skipinu aftur í útkallshæft ástand.

Að sögn aðila sem koma að málinu eru slíkar bilanir ekki óalgengar í eldri tækjum, en atvikið undirstrikar mikilvægi þess að tryggja traustan og nútímalegan björgunarbúnað á svæðinu.

Björgunarbátasjóður Suðurnesja vinnur nú að stóru átaksverkefni þar sem safnað er fyrir nýju björgunarskipi fyrir svæðið. Nýtt skip myndi auka öryggi sjófarenda á Suðurnesjum til framtíðar og tryggja að björgunaraðgerðir geti farið fram hratt og örugglega við fjölbreyttar aðstæður.

Áhöfnin á Hannesi Þ. Hafstein heldur nú áfram bilanagreiningu og viðgerðum með það markmið að gera skipið sem fyrst útkallsfært á ný.