Uppbyggingarsjóður 2022
Uppbyggingarsjóður 2022

Fréttir

Banna för yngri en 12 ára að gosinu
Nú er það þannig að lögreglan hefur sett upp lokunarpósta í stað þess að björgunarsveitirnar reyni að halda aftur af fólki. Lokunarpósturinn inná svæðið Grindavíkurmegin er austur í Þórkötlustaðahverfi og er þeim hleypt framhjá sem eru á leið um suðurstrandarveg og í gegnum svæðið en þeim sem ætla sér að skoða gosið er snúið við. VF-mynd: Jón Steinar Sæmundsson
Þriðjudagur 9. ágúst 2022 kl. 12:49

Banna för yngri en 12 ára að gosinu

Erfiðlega hefur gengið að hefta för foreldra með ung börn inn að gosinu sem í flestum tilfellum eru erlendir ferðamenn og það þrátt fyrir góða upplýsingagjöf um að gossvæðið sé ekki staður fyrir ung börn að dvelja á. Börn og foreldrar þeirra hafa í mörgum tilfellum verið mjög illa búin og svo virðist sem fólk geri sér enga grein fyrir því hvar það er statt og hvað bíður þeirra á erfiðri og langri göngu að gosstöðvunum.

Að gefnu tilefni og með hagsmuni barna að leiðarljósi hefur lögreglustjórinn á Suðurnesjum því ákveðið að takmarka aðgengi barna yngri en 12 ára að gosstöðvunum þegar svæðið er opið.

Eftirlit lögreglu og björgunarsveita verður með umferð ökutækja um Suðurstrandarveg. Eftirlit gangi eftir með þeim hætti sem nú er tilkynnt.

Heimild fyrir aðgerðum lögreglustjóra er sótt í 23. gr. laga um almannavarnir nr. 82/2008.

23. gr. Almenn fyrirmæli á hættustundu.
Á hættustundu er lögreglustjóra heimilt að ákveða að taka í sínar hendur umferðarstjórn, banna dvöl eða umferð á ákveðnum svæðum, svo sem með því að girða af eða hindra umferð um þau, þ.m.t. tilteknar fasteignir, taka í sínar vörslur hættulega muni, vísa á brott eða fjarlægja fólk.
Fyrirmælum þessum er öllum skylt að hlíta.