Gekk 40 sinnum upp að gosstöðvunum og missti þrjá dróna ofan í kvikuna!

„Fljótlega eftir að eldgos hófst á Reykjanesskaga í mars 2021 fór ég upp að gosstöðvunum með myndavélina mína. Eftir nokkrar ferðir ákvað ég að skipta yfir í drónamyndatöku til að fanga gosið betur, enda tók það miklum breytingum á þessum fyrstu vikum,“ segir Magnús Einarsson sem mætir með myndasýninguna Eldur á Reykjanesskaga á Safnahelgi á Suðurnesjum, tekur á móti gestum og gefur innsýn í tilurð verksins í Bókasafni Reykjanesbæjar.

„Hér var komið kjörið tækifæri til að safna myndum sem gátu fallið vel að ákveðnu verkefni sem fólst í því að tengja saman tónlist Gustavs Holst og ljósmyndir af náttúru Íslands. Hérna runnu vel saman iðandi eldgos og hraði í tónlistarþættinum sem Holst kennir við fyrstu plánetuna, Mars. Flæði kviku, tóna og lita í þessari sýningu spannar rétt tæpar 8 mínútur. Dróninn varð skyndilega lykillinn að því að fanga þennan samruna kviku, tóna og lita,“ segir í frétt frá Safnahelgi á Suðurnesjum.

Þessi stórbrotna kvikmynd samanstendur af drónamyndskeiðum sem tekin eru af sex eldgosum á tímabilinu 2021 til 2024. Magnús tekur fram að markmiðið hafi þó aldrei verið að búa til beina heimildamynd í klassískum skilningi um eldgos á Reykjanesskaga.

Sýningar verða í Félagsbíói á bókasafninu laugardaginn kl. 13-17. Sjón er sögu ríkari!

Sýnd á hálftíma fresti til kl. 17.00.