Aðstoðar fólk í atvinnuleit með símann að vopni

„Lykillinn er að tala við fólk. Ekki senda tölvupóst,“ segir Aðalheiður Hilmarsdóttir hjá Reykjanesbæ. Aðalheiður eða Heiða var ráðin til Reykjanesbæjar í gegnum úrræðið „Hefjum störf“ með það í huga að hún myndi vinna með þetta sama úrræði til að útvega langtímaatvinnulausum vinnu. Hún er því nokkurs konar atvinnumiðlari og á örfáum mánuðum hefur Heiða fengið vinnu fyrir yfir áttatíu einstaklinga sem höfðu verið án vinnu í tvö ár eða lengur. Það er Súlan verkefnastofa, sem heyrir undir menningar- og atvinnuráð, sem réð Heiðu til starfa en hún vinnur einnig náið með velferðarþjónustu Reykjanesbæjar og Vinnumálastofnun í sínum verkefnum.

Aðalheiður fer yfir málið ásamt Sigurgesti Guðlaugssyni, verkefnastjóra atvinnu- og viðskiptaþróunar hjá Súlunni í viðtali í Víkurfréttum sem komu út rafrænt á þriðjudagskvöld en prentuðu blaði hefur verið dreift á 30 dreifingarstöðum á Suðurnesjum og liggur m.a. fram í Nettó verslunum.

Sjáið viðtalið við atvinnumiðlarann Heiðu í Víkurfréttum vikunnar.