Vogar - vaxandi bær

Það er ánægjulegt að sjá hvernig Sveitarfélagið Vogar hefur vaxið og dafnað undanfarið. Nú höfum við náð þeim áfanga að 2.000 manns velja að hafa hér búsetu. Fleiri fjölskyldur setjast hér að sem leiðir óhjákvæmilega til fjölgunar barna í leik- og grunnskólum sveitarfélagsins. Þessi þróun er gleðiefni en kallar jafnframt á að við bregðumst hratt og markvisst við til að tryggja börnum okkar góða aðstöðu til náms.

Undanfarið hefur verið unnið að því að mæta fjölgun nemenda með því að bæta við færanlegum kennslustofum bæði við Stóru-Vogaskóla og Heilsuleikskólann Suðurvelli. Þær lausnir eru tímabundnar en nauðsynlegar á meðan unnið er að varanlegri úrbótum.

Framundan er stækkun skólans og er undirbúningsvinna langt komin. Starfshópur sem skipaður var vegna stækkunarinnar hefur þegar skilað af sér áhugaverðum hugmyndum sem unnið verður áfram með. Það styttist því í að hægt verði að hefja framkvæmdir sem munu bæta aðstöðuna innanhúss til muna. Viðbyggingin mun meðal annars hýsa bókasafn og tónlistarskóla sveitarfélagsins og bæta svo um munar vinnuaðstöðu starfsfólks og nemenda. Innan veggja skólans fær Frístund einnig aðstöðu sem lengi hefur verið þörf á.

Hugmyndir að endurbótum á lóð skólans verða einnig unnar samhliða hönnun og byggingu á skólanum. Þær munu líta dagsins ljós fyrr en síðar og verða unnar í samráði og samstarfi við nemendur skólans.

Samhliða stækkun skólans stöndum við frammi fyrir áskorunum í leikskólamálum. Fjölgun barna á leikskólaaldri hefur verið hröð og ljóst er að núverandi húsnæði ræður ekki við eftirspurn. Unnið er að lausnum sem miða að því að fjölga deildum leikskólans svo hægt verði að fjölga í þeim hópi barna sem tekin verða inn næstkomandi  haust. Sú lausn er nauðsynleg til að mæta brýnni þörf fjölskyldna í sveitarfélaginu.

Þótt um tímabundna úrlausn sé að ræða er jafnframt ljóst að huga þarf að uppbyggingu nýs leikskóla sem mætir áframhaldandi vexti samfélagsins. E-listinn mun standa fyrir því að vinna við hönnun og undirbúning nýs leikskóla í Grænubyggð hefjist. Sú vinna er nauðsynleg og ljóst að nýr leikskóli þarf að rísa í nánustu framtíð. Með því tryggjum við að börn á leikskólaaldri njóti öryggis og gæða til náms og leiks í Vogum.

Uppbygging skólamála krefst skýrra aðgerða, forgangsröðunar og góðrar samvinnu. Þannig tryggjum við að Vogar standi undir vexti og verði áfram sterkt samfélag fyrir börn og fjölskyldur þeirra.

Eva Björk Jónsdóttir skipar 2. sæti E-listans
Bæjarfulltrúi og formaður fræðslunefndar í Sveitarfélaginu Vogum