RNB upplýsingafundur
RNB upplýsingafundur

Aðsent

Dagur tónlistarskólanna
Sunnudagur 4. febrúar 2024 kl. 06:01

Dagur tónlistarskólanna

– og hljóðfærakynning fyrir Forskóla 2

Tónlistarskólar landsins eru um 90 talsins og standa fyrir fjölbreyttu og öflugu skólastarfi. Hátíðisdagur þeirra, „Dagur tónlistarskólanna“, er haldinn 7. febrúar ár hvert. Þann dag fæddist Gylfi Þ. Gíslason sem var menntamálaráðherra frá 1956 til 1971 en hann hefur gjarnan verið kallaður „faðir íslenskra tónlistarskóla“. Gylfi kom því í gegn á ráðherratíð sinni að sveitarfélög sem hefðu hug á því að stofna tónlistarskóla fengju til þess styrk úr ríkissjóði sem næmi 25% af launakostnaði. Síðar var hann aðalhvatamaðurinn að því að launaframlag ríkisins var aukið í 50% sem varð sveitarfélögum enn meiri hvatning til að stofna tónlistarskóla og þá fjölgaði þeim umtalsvert. Íslenskt tónlistarlíf og -menntun mun alla tíð búa að framsýni Gylfa Þ. Gíslasonar og áhuga hans á aukinni, markvissri tónlistarmenntun þjóðarinnar.

Í tilefni af Degi tónlistarskólanna hafa íslenskir tónlistarskólar efnt til ýmis konar viðburða og/eða kynninga í gegnum tíðina með það að markmiði að auka sýnileika og styrkja tengsl við nærsamfélagið. Tónlistarskóli Reykjanesbæjar hefur ekki verið eftirbátur annarra í því og hefur alla tíð haldið þessum degi á lofti.

Public deli
Public deli

Miðvikudaginn 7. febrúar n.k. verður haldinn einn af hinum reglubundnu „17:30 nemendatónleikum“ skólans en vegna þess að tónleikana ber upp á Dag tónlistarskólanna verða þeir veglegri en oftast áður. Að sjálfsögðu eru allir velkomnir.

Veislan heldur áfram og í tilefni af Degi tónlistarskólanna efnir skólinn til hljóðfærakynningar í Tónlistarskólanum laugardaginn 10. febrúar n.k. fyrir nemendur í Forskóla 2, sem eru öll börn í Reykjanesbæ í 2. bekk grunnskólanna. Dagskráin hefst kl.10:30 í Rokksafni Íslands í Hljómahöll með stuttum tónleikum forskólanemendanna þar sem þeir flytja tvö hressileg lög við undirleik kennarahljómsveitar tónlistarskólans. Að tónleikunum loknum fá forskólanemendurnir kynningar í stofum tónlistarskólans á þeim hljóðfærum sem hæfir ungum börnum að hefja nám á að forskólanáminu loknu. Það verða kennarar skólans sem sjá um kynningarnar. Nemendur forskólans fá jafnframt að prófa hljóðfærin og munu tónlistarkennararnir leiðbeina þeim. Hljóðfærakynningunni lýkur kl. 12:15 og þar með dagskránni.

Haraldur Árni Haraldsson,
skólastjóri Tónlistarskóla Reykjanesbæjar.