Steinn Erlingsson fallinn frá

Steinn Erlingsson, vélstjóri og söngvari, lést á Heilbrigðisstofnun Suðurnesja þann 1. apríl síðastliðinn, 87 ára að aldri. Steinn skilur eftir sig stórt spor í menningarlífi svæðisins, en hann var landskunnur fyrir baritónrödd sína og áratugalangt starf í þágu kórlistar og félagsmála.

Steinn fæddist í Steinshúsi í Gerðahverfi í Garði þann 14. janúar 1939, sonur Guðrúnar S. Gísladóttur og Erlings Eylands Davíðssonar. Hann ólst upp við mikla tónlist á Sólbakka í Garði, þar sem sungið var og leikið á hljóðfæri nánast hvern einasta dag. Garðurinn átti ávallt stóran stað í hjarta Steins og var hann mikill áhugamaður um ættir og staðhætti á heimaslóðum.

Eiginkona Steins var Hildur Guðmundsdóttir frá Tálknafirði (d. 2012). Þau kynntust á síldarárunum á Norðfirði og bjuggu lengst af á Faxabraut í Keflavík og síðar í Innri-Njarðvík. Þau eignuðust fjögur börn: Einar Ólaf (d. 2017), Dagnýju Öldu, Unu og Guðmund Kristin (d. 2010). Hin síðari ár var Hafdís Daníelsdóttir kær vinkona Steins og samfylgdarmaður.

Steinn lærði vélstjórn og starfaði til sjós í tæp tuttugu ár. Um miðjan áttunda áratuginn hóf hann störf hjá Hitaveitu Suðurnesja þar sem hann vann að því mikilvæga verkefni að innleiða hitaveitu í hús á Suðurnesjum. Hann starfaði síðar á skrifstofu fyrirtækisins við innheimtu allt þar til hann settist helgan stein.

Það var fyrst eftir að Steinn kom í land að hann gaf söngnum algjörlega lausan tauminn. Hann gekk í Karlakór Keflavíkur og hóf nám við Tónlistarskólann í Keflavík og síðar í Garðabæ, þaðan sem hann lauk burtfararprófi árið 1985. Hann sótti einnig framhaldsnám til Arizona í Bandaríkjunum.

Steinn var stoð og stytta í kórstarfi á Suðurnesjum. Hann söng með Kirkjukór Keflavíkur til dauðadags, Karlakór Keflavíkur, Óperukórnum og Eldey. Árið 1996 gaf hann út hljómplötuna Ó, bjarta nótt, sem var fyrsta einsöngsplatan gefin út af Suðurnesjamanni og hlaut hún frábæra dóma. Fyrir framlag sitt til kirkjutónlistar hlaut hann Liljuna, heiðursviðurkenningu Þjóðkirkjunnar, og í desember 2024 var hann sæmdur Súlunni, menningarverðlaunum Reykjanesbæjar.

Steinn var mikill áhugamaður um íþróttir og þá sérstaklega golf. Hann var félagi í Golfklúbbi Sandgerðis og spilaði nánast hvern einasta dag, óháð veðri. Þá var hann einnig slyngur briddsspilari og naut samvista við vini sína við spilaborðið allt til hinstu stundar.

Útför Steins Erlingssonar fer fram frá Keflavíkurkirkju þriðjudaginn 14. apríl, klukkan 13:00.