Rokkið sigraði í Frumleikhúsinu

Söngleikurinn We Will Rock You var frumsýndur hjá Leikfélagi Keflavíkur föstudagskvöldið 6. mars við kröftugar undirtektir hjá fullu húsi áhorfenda. Sýningin þykir bera vott um óvenju mikinn metnað og samheldni en sérstaka athygli vekur hversu djarflega og skemmtilega verkið hefur verið staðfært að íslenskum veruleika og jafnvel nærsamfélaginun í Reykjanesbæ.

Það var mikið í húfi þegar frumsýningin hófst í Frumleikhúsinu en undirbúningur hefur staðið yfir vikum saman. Verkið, sem gerist í framtíð þar sem tónlist og sjálfstæð hugsun er bönnuð, virkaði sem fullkominn vettvangur fyrir þann „bilaða talent“ sem leikstjórinn Kristín Lea Sigríðardóttir segir í viðtali við Víkurfréttir að finnist á Suðurnesjum.

Snilldarleg staðfæring og íslenskur húmor

Þótt söngleikurinn sé upprunalega skrifaður af Ben Elton í samstarfi við Queen hefur Leikfélag Keflavíkur farið þá leið að færa verkið nær heimahögunum. Staðfæringin hefur heppnast einstaklega vel; hún er ekki bara á íslensku heldur er heimabær leikfélagsins einnig órjúfanlegur hluti af handritinu.

Til að skreyta textann og kalla fram húmor er fjöldi kunnuglegra textabrota úr íslenskum dægurlögum og jafnvel tilvitnanir úr íslenskum kvikmyndum ofin inn í samræðurnar. Þetta gefur sýningunni ferskleika og nánd sem áhorfendur kunnu svo sannarlega að meta á frumsýningunni.

Söngur og dans upp á tíu!

Þótt leikararnir í aðalhlutverkum, þau Guðjón Smári Smárason (Galíleó) og Margrét Arna Ágústsdóttir (Scaramouche), hafi heillað salinn með kröftugum söng sínum er ljóst að sýningin er afrakstur mikils liðsstyrks. Kristín Lea leikstjóri leggur í sýningarskrá ríka áherslu á að hver einasti hlekkur sé mikilvægur. „Þetta ferðalag hefur átt mig alla daga og nætur,“ segir Kristín, en hún þakkar hópnum sérstaklega fyrir traustið og hvernig leikararnir fengu að vaxa inn í sín hlutverk og „stíga inn í sitt eigið ljós“.

Sama má segja um Helgu Ástu Ólafsdóttur, danshöfund, sem náði að skapa karakterdrifnar hreyfingar sem fylltu sviðið af orku. „Hreyfingarnar spretta úr persónunum sjálfum, styrkleikum þeirra og veikleikum,“ segir Helga Ásta. Hún mætti með kanónur úr dansskólanum sínum, Danskompaní, en virkjaði einnig gamalgróna leikara leikfélagsins til að taka spor á sviðinu. Söngur og dans spilar stóra rullu í uppfærslunni og útkoman er upp á tíu. Sá sem þetta skrifar fékk að vita það í sýningarlok að þrír leikarar voru að glíma við flensu á frumsýningunni, en þess sáust þó engin merki á sýningunni, þvílíkur var krafturinn.

Að tjaldabaki

En rokkið verður ekki til án þeirra sem sjá til þess að allt gangi smurt á bak við tjöldin. Sýningin hvílir á herðum fjölmenns hóps:

Tónlistin: Lifandi hljómsveit undir stjórn Sigurðar Smára Hanssonar gaf sýningunni þann hráa kraft sem tónlist Queen krefst.

Umgjörð og tækni: Leikmynd og grafík Davíðs Arnar Óskarssonar ásamt ljósahönnun Sigurðar Boga Ólafssonar sköpuðu hinn fullkomna og töfrandi framtíðarheim iPLANET. Þá skiptir hljóðvinnsla gríðarlegu máli og Þórhallur Arnar Vilbergsson skilaði þeirri vinnu óaðfinnanlega. Búningar, hár og förðun unnu svo saman að því að gera heildarmyndina ógleymanlega og breyta hópnum í „Bohema“ og framtíðarfígúrur.

Tryggið ykkur miða!

Frábærar undirtektir á frumsýningu og þá staðreynd að þegar er orðið uppselt á nokkrar sýningar sýna svo ekki verður um villst að starfsemi Leikfélags Keflavíkur er bæjarfélaginu dýrmæt. Að ná að setja upp svo vandaða og stóra sýningu er afrek sem leikfélagsfólkið og bæjarbúar mega vera stoltir af.

Ef marka má frumsýningarkvöldið þá hefur boðskapurinn um frelsi, sköpun og ást náð tilgangi sínum. Fyrir þá sem vilja upplifa kraftinn, hláturinn og gæsahúðina sem fylgir því að sjá hópinn „rokka rækilega“ eru næstu sýningar framundan. Nokkrar sýningar eru í sölu fram til næstu mánaðamóta en búast má við að það verði fljótt þétt setið í Frumleikhúsinu. Ekki láta þetta verk framhjá ykkur fara!

Hilmar Bragi Bárðarson