max
max

Mannlíf

Æðislegt að búa í Reykjanesbæ
Marta Eiríksdóttir
Marta Eiríksdóttir skrifar
fimmtudaginn 24. október 2019 kl. 07:42

Æðislegt að búa í Reykjanesbæ

segir nýbúinn og söngvarinn Sverrir Bergmann

„Ég flutti hingað 15. ágúst 2018. Konan var að vinna upp á velli og mig var búið að langa til þess að flytja úr borginni í einhvern tíma. Það var því upplagt að flytja hingað,“ segir hinn kunni tónlistarmaður Sverrir Bergmann einn margra nýbúa í Reykjanesbæ sem fagnar 25 ára afmæli á árinu 2019.

Hvernig líkar þér að búa hér?

„Mér finnst æðislegt að búa hér. Ég fæ aftur einhverja svipaða tilfinningu og þegar ég bjó á Sauðárkróki í æsku.“

Hefurðu eignast marga vini hérna?

„Já, ég hef kynnst fólkinu sem býr hér í kringum mig. Einnig hef ég kynnst mikið af öðru frábæru fólki. Þetta eru allt saman öðlingar.“

Hvernig upplifirðu bæjarstemninguna?

„Fólki þykir vænt um hvort annað og hollur rígur er á milli íþróttafélaganna sem myndar ákveðna stemningu. Svo kemst ég nú vonandi meira inn í hlutina eftir því sem ég bý hér lengur.“

Er gott að ala upp börn hér?

„Ég á engin börn en fyrsta er á leiðinni. Þannig að ég get ekki svarað því alveg strax. En ég er sannfærður um að það sé frábært!“

Hvað finnst þér um möguleika til útivistar á Suðurnesjum?

„Það eru endalausir möguleikar til útivistar á Suðurnesjum. Gríðarleg náttúra, nóg af stígum og öðru. Rokið getur gert þetta strembið á köflum en það er þannig allstaðar.“

Hvað finnst þér best við bæinn?

„Fólk heilsar hvort öðru og býður góðan daginn.“

Hvað með verslanir, ertu duglegur versla í heimabyggð, mat, föt, sérvöru o.fl.?

„Ég reyni eftir mesta megni að versla í Reykjanesbæ og tekst það í nánast öllum tilfellum. Hef alveg lent í því að þurfa að fara í höfuðborgina þar sem hlutir fengust ekki hér en það ætti nú að vera lítið mál að laga það.“

Eitthvað að lokum sem þú vilt koma á framfæri?

„Höldum áfram að vera góð við hvort annað.“

Ljósmyndastofa Oddgeirs
Ljósmyndastofa Oddgeirs