Njarðvík í kjörstöðu
Njarðvík er komið með örugga 2-0 forystu í úrslitaeinvígi Bónusdeildar kvenna í körfuknattleik eftir afar spennandi 75-70 sigur á Haukum í kvöld. Þrátt fyrir að Haukar hafi verið nálægt því að stela sigrinum á lokamínútunum, reyndust Njarðvíkingar sterkari á lokasprettinum.
Haukakonur mættu grimmari til leiks og leiddu 27-22 eftir fyrsta leikhluta, þar sem Tinna Guðrún Alexandersdóttir fór mikinn og skoraði 12 stig snemma leiks. Njarðvík náði hins vegar að vinna sig aftur inn í leikinn í öðrum leikhluta og var staðan hnífjöfn í hálfleik, 42-42.
Spennan í hámarki
Seinni hálfleikur var hálfgerður rússíbani. Liðin skiptust á að hafa forystuna og fyrir lokafjórðunginn munaði aðeins fjórum stigum, 62-58, Njarðvík í vil.
Þegar rúmar sex mínútur voru eftir af leiknum kom Þóra Kristín Jónsdóttir Haukum yfir, 64-65. Undir lokin var allt í járnum. Brittany Dinkins svaraði fyrir Njarðvík og kom þeim í 66-65 af vítalínunni. Haukar settu stóran þrist þegar tæp mínúta var eftir og breyttu stöðunni í 68-70.
Helena Rafnsdóttir reyndist hetja Njarðvíkur þegar hún svaraði samstundis með þriggja stiga körfu og kom Njarðvík í 71-70.
Hersler innsiglaði sigurinn
Lokamínútan var taugatrekkjandi. Brittany Dinkins jók muninn í 72-70 úr víti en brenndi af síðara skotinu. Haukar náðu ekki að nýta síðustu sókn sína og það var Paulina Hersler sem innsiglaði sigurinn með sniðskoti þegar 13 sekúndur voru eftir.
Lokatölur 75-70 og Njarðvík vantar nú aðeins einn sigur til að tryggja sér Íslandsmeistaratitilinn.
Njarðvík-Haukar 75-70 (22-27, 20-15, 20-16, 13-12)
http://kki.is/widgets_game.asp
Njarðvík: Brittany Dinkins 30/9 fráköst, Danielle Victoria Rodriguez 15/6 fráköst/5 stoðsendingar/3 varin skot, Paulina Hersler 8/5 fráköst, Helena Rafnsdóttir 7/4 fráköst, Hulda María Agnarsdóttir 6/6 fráköst, Sara Björk Logadóttir 4, Krista Gló Magnúsdóttir 3, Sofia Roma 2, Eygló Kristín Óskarsdóttir 0, Kristín Björk Guðjónsdóttir 0, Inga Lea Ingadóttir 0, Helga Jara Bjarnadóttir 0.
Haukar: Tinna Guðrún Alexandersdóttir 16/5 fráköst, Krystal-Jade Freeman 16/11 fráköst, Catherine Mosengo Masa 16/9 fráköst, Amandine Justine Toi 9/5 stoðsendingar, Þóra Kristín Jónsdóttir 7/4 fráköst, Sólrún Inga Gísladóttir 3/4 fráköst, Sigrún Björg Ólafsdóttir 2/6 fráköst, Rósa Björk Pétursdóttir 1, Ísabella Fjeldsted Magnúsdóttir 0, Lovísa Björt Henningsdóttir 0, Arnheiður Ísleif Ólafsdóttir 0, Agnes Jónudóttir 0.
Dómarar: Kristinn Óskarsson, Jóhannes Páll Friðriksson, Jakob Árni Ísleifsson
Áhorfendur: 987
Viðureign: 2-0
