Keflvíkingar náðu í þrjú stig á Skipaskaga
Keflvíkingar sóttu þrjú stig á Skipaskaga eftir flottan 1-3 sigur á heimamönnum í Bestu deild karla í knattspyrnu. Með sigrinum lyftu Keflvíkingar sér upp í efri helming deildarinnar með sjö stig.
Ásgeir Páll Magnússon skoraði fyrsta mark Keflvíkinga á 30.mínútu með nettum skalla eftir hornspyrnu Alghoul.
Heimamenn voru aðeins meira með boltann en náðu ekki að skapa sér hættuleg marktækifæri.
Axel Ingi Jóhannesson, hægri bakvörður Keflavíkur skoraði skemmtilegt mark á 64. mínútu eftir flotta sókn þar sem Eiður Orri Ragnarsson sendi á hann inn í teig. Bakvörðurinn tók við boltanum og sendi hann í markið á nærstöngina, 0-2.
Stefan Ljubicic skoraði þriðja mark Keflvíkinga á 71. mínútu á snyrtilegan hátt. Hann fékk sendingu frá Alpha Conteh sem vann boltann á miðjum velli og sendi hann inn að teig. Ljubicic tók þar við boltanum og kláraði dæmið með flottu marki og kom Keflvíkingum í 0-3. Fjórða mark Stefans sem hefur verið öflugur í byrjun móts.
Þó heimamenn næðu að setja mark á 78. mín. Var sigur Keflvíkinga aldrei í hættu.
Með sigrinum eru Keflvíkingar komnir í 6. sæti deildarinnar með sjö stig.
Haraldur þjálfari Keflavíkur var í viðtali hjá fotbolti.net eftir leik.
