Blik í auga
Blik í auga

Íþróttir

Keflavíkurstelpur unnu Aftureldingu
Claudia skoraði sigurmarkið, sitt fyrsta fyrir Keflavík. Hér er hún í sínum fyrsta leik með Keflavík gegn Tindastóli. Mynd úr safni Víkurfrétta.
Jóhann Páll Kristbjörnsson
Jóhann Páll Kristbjörnsson skrifar
laugardaginn 12. september 2020 kl. 17:12

Keflavíkurstelpur unnu Aftureldingu

Keflavík fór með sigur af hólmi þegar kvennalið Keflavíkur tók á móti Aftureldingu í dag á Nettóvellinum í 15. umferð Lengjudeildar kvenna.

Aðeins eitt mark var skorað í leiknum. Það kom á fimmtándu mínútu og var þar að verki Claudia Nicole Cagnina með sitt fyrsta mark fyrir félagið. Hún fékk langa og háa sendingu inn fyrir vörn Aftureldingar og afgreiddi boltann viðstöðulaust yfir markvörð gestanna sem átti engan möguleika á að verja. Glæsilegt mark.

Markið dugði Keflavík til sigurs því fleiri urðu mörkin ekki. Keflvíkingar voru betri aðilinn í leiknum þótt Afturelding legði aukinn kraft í sóknina á síðustu mínútunum.

Keflavík er í öðru sæti deildarinnar, fjórum stigum á eftir Tindastóli og sjö stigum fyrir ofan Hauka sem eiga leik til góða.