Haraldur Árni rekinn frá Grindavík - án vitundar stjórnarmanns

„Ha, er búið að reka Harald Árna,“ spurði stjórnarmaður knattspyrnudeildar UMFG, Ólafur Már Sigurðsson, þegar blaðamaður spurði hann út í þessa ákvörðun, með að reka þjálfara karlaliðs félagsins, Harald Árna Hróðmarsson. Ólafur kom af fjöllum, sagðist bakka Harald Árna upp en þegar blaðamaður benti honum á frétt á fotbolti.net, varð löng þögn.

Mikið hefur gustað um meistaraflokk karlaliðs Grindavíkur að undanförnu, Haukur Einarsson sagði upp sem formaður og bar við trúnaðarbresti sem beindist að Ólafi Má. Haukur vildi meina að Ólafur hefði samið við varnarmann þvert gegn vilja annarra stjórnarmanna. 

Fimm leikmenn komu í félagsskiptaglugganum, m.a. þrír útlendingar en gengi liðsins hefur verið lélegt að undanförnu og botninn tók greinilega úr hjá sumum stjórnarmönnum, við tapið gegn Völsungi á útivelli í gær. 

Grindavík er þó ekki í fallsæti en falldraugurinn vofir hins vegar yfir bænum, í orðsins fyllstu merkingu!