Vatnslögn til Grindavíkur laskaðist í skjálftanum
Fram kemur á Facebook-síðu Grindavíkurbæjar að vegna leka í dreifikerfi sé lítill sem enginn þrýstingur á köldu vatni en vatnslögn til Grindavíkur laskaðist í stóra skjálftanum í dag. Búið er að staðsetja lekann og unnið er að viðgerð.
Í tilkynningu frá almannavörnum í kvöld eru íbúar hvattir til þess að huga að lausa- og innanstokksmunum sem geta fallið við jarðskjálfta og huga sérstaklega að því að ekki geti fallið lausamunir á fólk í svefni. Veðurstofa Íslands hefur einnig vakið athygli á því að grjóthrun og skriður geti farið af stað í brattlendi og því er gott að sýna aðgát við brattar hlíðar. Rétt er að geta þess að tjón á munum og eignum er tilkynnt á vefsíðu Náttúruhamfaratrygginga Íslands. Ef slys hafa orðið á fólki er það tilkynnt til 112.