Tekist á um veðsetningu á Vatnsnesvegi 8

Miklar umræður og nokkrar bókanir voru á fundi bæjarráðs Reykjanesbæjar í gær, 13. ágúst, þegar tekin var fyrir beiðni KEF ehf. um heimild til veðsetningar á 49% eignarhlut félagsins í Vatnsnesvegi 8. Beiðnin var að lokum samþykkt með þremur atkvæðum meirihlutans gegn tveimur atkvæðum minnihlutans.

Minnihlutinn vísar í kvaðir dánargjafabréfs

Bæjarfulltrúar Framsóknarflokksins og Samfylkingarinnar greiddu atkvæði gegn veðsetningunni og lögðu fram bókun þar sem vísað var til dánargjafabréfs Bjarnfríðar Sigurðardóttur frá árinu 1969 og samstarfssamnings Reykjanesbæjar og KEF ehf. frá 2022.

Fulltrúar minnihlutans bentu á að í skjölunum kæmi fram að óheimilt væri að selja, gefa eða veðsetja eignina. Þeir telja að veðsetningin samræmist ekki þeim kvöðum sem hvíla á eigninni og að skýr lagaleg heimild þurfi að liggja fyrir áður en horfið er frá þeim.

Meirihlutinn segir að um sé að ræða misskilning

Meirihluti bæjarráðs, skipaður fulltrúum Sjálfstæðisflokks og Miðflokks, samþykkti beiðnina og hafnaði röksemdum minnihlutans. Í bókun meirihlutans kom fram að þinglýst eignarheimild einkaaðilans veiti honum heimild til að veðsetja sinn hluta og að það hafi engin áhrif á eignarhlut sveitarfélagsins.

Meirihlutinn hélt því fram að minnihlutinn byggði afstöðu sína á misskilningi á texta dánargjafabréfsins. Kvaðirnar um bann við veðsetningu hafi á sínum tíma átt við gefandann sjálfan (Bjarnfríði Sigurðardóttur) en gildi ekki um núverandi eigendur. Þá bentu þeir á að minnihlutinn hafi sjálfur staðið að sölu á 49% hlutnum á sínum tíma þegar hann var í meirihluta, sem hafi verið talsvert viðamikilli ráðstöfun en sú veðsetning sem nú væri til umfjöllunar.

Niðurstaða fundarins

Að loknum nokkrum fundarhléum og gagnkvæmum bókunum var beiðni KEF ehf. samþykkt með þremur atkvæðum (Gunnlaugs Kárasonar, Margrétar Þórarinsdóttur og Kristjáns Péturs Kristjánssonar) gegn tveimur atkvæðum minnihlutans (Halldóru Fríðu Þorvaldsdóttur og Guðnýjar Birnu Guðmundsdóttur).