Starf skólameistara FS auglýst laust til umsóknar

Mennta- og barnamálaráðuneytið hefur auglýst embætti skólameistara Fjölbrautaskóla Suðurnesja (FS) laust til umsóknar. Eins og kunnugt er sagði Kristján Ásmundsson, skólameistari, embætti sínu lausu á dögunum til að mótmæla aðgerðaleysi stjórnvalda í húsnæðismálum skólans.

Fjölbrautaskóli Suðurnesja, sem var stofnaður árið 1976 og því 50 ára á árinu, er einn af burðarásunum í menntakerfi Suðurnesja. Skólinn þjónar um 1.300 nemendum í dagskóla, síðdegisnámi og í gegnum samstarf við grunnskóla svæðisins. Í auglýsingu ráðuneytisins er lögð áhersla á að skólinn sé áfangaskóli þar sem bóknám og verknám standa jafnfætis.

Sá leiðtogi sem leitað er að þarf að hafa skýra sýn á þróun framhaldsskólastigsins, sérstaklega með tilliti til örrar tækniþróunar og breyttra hæfnikrafna í samfélaginu. Fram kemur að á næstu misserum verði lögð aukin áhersla á styrkingu stjórnsýslu, umgjörð skólans og gagnadrifna ákvarðanatöku.

Skólameistari er skipaður af mennta- og barnamálaráðherra til fimm ára í senn, að fenginni umsögn skólanefndar. Gert er ráð fyrir að nýr skólameistari taki við embættinu þann 1. ágúst 2026. Umsóknarfrestur er til og með 18. maí næstkomandi.