Meiri hagræðingu í rekstri og ekki fleiri hælisleitendur

Gunnlaugur Kárason leiðir Miðflokkinn sem býður fram í fyrsta skipti í Reykjanesbæ. Tilbúinn í bæjarstjórastólinn komi það tækifæri upp og telur sig vera með þekkingu og reynslu í það verkefni.

Gunnlaugur segir flokkinn mættan til leiks til að vera virkur þátttakandi í öllu pólitísku starfi bæjarins en ekki bara láta sjá sig á fjögurra ára fresti. Hann treystir sér vel til að setjast í bæjarstjórastólinn, vill loka á móttöku hælisleitenda og telur að ríkið eigi að afhenda bænum þá starfsemi sem Kadeco sinnir.

Gunnlaugur, eða Gulli eins og hann er gjarnan kallaður, er enginn nýgræðingur í bæjarmálum þótt hann leiði nú nýtt framboð. Hann sat sem varabæjarfulltrúi fyrir Sjálfstæðisflokkinn á árunum 2010 til 2014 en segist hafa fundið sjálfan sig í stefnuskrá Miðflokksins.

Viðtalið er í spilaranum hér að ofan.

Gunnlaugur Kárason, oddviti Miðflokksins í Reykjanesbæ, segir flokkinn mættan til leiks til að vera virkur þátttakandi í öllu pólitísku starfi bæjarins en ekki bara láta sjá sig á fjögurra ára fresti. Hann treystir sér vel til að setjast í bæjarstjórastólinn, vill loka á móttöku hælisleitenda og telur að ríkið eigi að afhenda bænum þá starfsemi sem Kadeco sinnir.

Gunnlaugur, eða Gulli eins og hann er gjarnan kallaður, er enginn nýgræðingur í bæjarmálum þótt hann leiði nú nýtt framboð. Hann sat sem varabæjarfulltrúi fyrir Sjálfstæðisflokkinn á árunum 2010 til 2014 en segist hafa fundið sjálfan sig í stefnuskrá Miðflokksins.

„Þegar ég las stefnuskrána fannst mér hún nánast eins og ég hefði skrifað hana sjálfur. Þar ríma áherslur á rekstur, menntamál og íþróttir fullkomlega við mínar skoðanir,“ segir Gunnlaugur. Hann segist brenna fyrir því að gera Reykjanesbæ að eftirsóknarverðasta staðnum á Íslandi. „Ég er 49 ára, fæddur og uppalinn hér, og hef tekið þátt í öllum innviðum sveitarfélagsins. Mér fannst þetta rétti tíminn til að koma að borðinu og hjálpa til.“

Sjálfstæðisflokkurinn í baksýnisspeglinum

Hafði Miðflokkurinn samband við þig eða komst þú sjálfur? Hefur þú ekki verið viðloðandi pólitík áður?

„Jú, það er ekkert launungarmál að ég var í Heimi, félagi ungra sjálfstæðismanna, og var varabæjarfulltrúi 2010 til 2014. Ég hef ekkert starfað þar síðan því mér þótti það ekki við hæfi á meðan ég vann í Landsbankanum og hjá HS Veitum. Svo var tékkað á manni hvort maður hefði áhuga. Þegar ég las stefnuskrá Miðflokksins var hún nánast eins og ég hefði skrifað hana sjálfur. Þar voru hlutir sem ég hafði verið að ræða; ég hef mikinn áhuga á rekstri, menntamálum og íþróttamálum og það rímar vel við þeirra stefnu. Þetta var því mjög auðvelt.“

Eigum að sækja fyrirtækin

Gunnlaugur leggur mikla áherslu á að bærinn sé lipur í samskiptum við atvinnulífið. Hann telur að sveitarfélagið eigi ekki að „þvælast fyrir“ heldur liðka fyrir með hröðum skipulagsbreytingum og skýrum svörum. Hann nefnir landeldið á Reykjanesi sem dæmi um risavaxið verkefni þar sem bærinn verður að vera vakandi fyrir afleiddum störfum.

Hvernig sérð þú fyrir þér þróunina í Helguvík eftir sögu kísilversins?

„Það er gott að verið sé að rífa kísilverið, það var sorgarsaga. Við þurfum að hugsa 10 ár fram í tímann. Þarna er að koma NATO-garður og ný bryggja. Við megum ekki troða öllu einhvers staðar; ef við ætlum að vera með matvælavinnslu getum við ekki verið með eitthvað annað þar sem truflar hana. Við erum stolt af flugstöðinni og bílaleigunum, en ég hef áhyggjur af því að við séum ekki nógu tilbúin. Það er ekki nógu mikið fjallað um þetta til að láta okkur vita að þetta sé allt í lagi.“

Hann lýsir sömuleiðis miklum áhuga á hátæknisorpbrennslu: „Þetta getur skapað 40 ársverk og yfir 100 afleidd störf, auk þess að skila hita og rafmagni. Miðflokkurinn er mjög hrifinn af þessu; þetta eru speglaverkefni úr Evrópu eins og í Kaupmannahöfn.“

Rekstur og innviðir undir smásjánni

Þótt rekstur Reykjanesbæjar hafi skilað hagnaði undanfarið varar Gunnlaugur við því að bókfærður hagnaður sé ekki það sama og góður rekstur ef handbært fé vantar. Hann boðar aukið eftirlit kjörinna fulltrúa með hverri krónu og telur að hægt sé að hagræða í stjórnsýslunni.

Hvaða hagræðingu sérðu fyrir þér í stjórnkerfinu?

„Ég sé hagræðingu í því að fækka nýlegum ráðum eins og sjálfbærniráði og lýðheilsuráði; þessi mál eiga heima í hefðbundnum ráðum. Svo þarf meira eftirlit með framkvæmdum sem fara fram úr áætlun. Við eyðum 52–53% í menntamál á meðan aðrir eyða innan við 50%. Við þurfum að velta við öllum steinum. Kjörnir fulltrúar verða að bera ábyrgð á eftirlitinu og tryggja að farið sé vel með hverja krónu af skattfénu.“

Varðandi húsnæðismál vill hann gæta þess að fórna ekki sérbýlum fyrir fjölbýli: „Okkur vantar raðhús og sérbýli í kringum 160–170 fermetra fyrir millitekjufólk og barnafjölskyldur. Við þurfum að laða að okkur fagstéttir, t.d. flugfólk hjá Icelandair, og þá þurfum við að eiga húsnæði sem hentar þeim.“

Innviðirnir sprungnir

Málefni hælisleitenda eru Gunnlaugi hugleikin og hann gagnrýnir bæjarstjórnina fyrir að hafa gert samninga við ríkið um móttöku á svo mörgum einstaklingum þegar innviðir bæjarins voru þegar undir miklu álagi.

Miðflokkurinn hefur farið mikinn í útlendingamálum. Hver er staðan hér í Reykjanesbæ?

„Við verðum að passa okkur á að rugla ekki saman harðduglegu vinnandi fólki af erlendum uppruna, sem við þurfum á að halda í ferðaþjónustunni, og svo hælisleitendadæminu. Innviðirnir okkar eru sprungnir. Ég er ekki sammála bæjarstjórninni um að hafa gert samninga við ríkið um móttöku á svo mörgum hælisleitendum. Þetta fór að hafa áhrif á öryggistilfinningu barna sem vildu sum ekki fara í strætó. Okkar stefna er skýr: við viljum ekki taka við einum einasta hælisleitanda næstu fjögur árin. Við þurfum að láta ríkið vita að við getum ekki meira.“

Frekari sameining og Kadeco í Reykjanesbæ

Gunnlaugur er einlægur talsmaður þess að Suðurnesjabær og Vogar sameinist Reykjanesbæ sem fyrst og krefst þess einnig að hlutverk Kadeco verði endurskoðað.

Hvað segirðu um frekari sameiningu sveitarfélaga?

„Ég er rosalega hlynntur sameiningu. Sameining Keflavíkur, Njarðvíkur og Hafna tókst mjög vel. Mér finnst engin spurning að Suðurnesjabær og Vogar eigi að sameinast Reykjanesbæ sem fyrst. Við værum miklu sterkari saman, t.d. gagnvart ríkinu í vegaframkvæmdum. Ef við komumst í bæjarstjórn munum við leggja til strax að leitað verði eftir sameiningu. Þá vil ég skoða tilveru Kadeco.“

Hvað áttu við með því?

„Kadeco tók yfir eignir varnarliðsins en nú spyrjum við: er ekki kominn tími til að Kadeco verði bara partur af Reykjanesbæ? Af hverju þarf að vera þarna eitthvað ríki í ríkinu uppi á Ásbrú? Okkur finnst að bærinn eigi að stýra þessu svæði sjálfur. Við viljum fá umræðu um þetta og sjá tækifæri í því að Reykjanesbær taki við þessu.“

Nýjar áherslur fyrir eldri borgara

Gunnlaugur vill sjá róttækar breytingar í málefnum eldri borgara og að samfélagið nýti krafta þessa hóps.

„Við viljum opna á að nota hvatagreiðslur eldri borgara í fleiri verkefni, t.d. andlegar eða líkamlegar meðferðir. Svo viljum við bjóða eftirlaunaþegum, s.s. kennurum, að koma inn í skólana og hjálpa til við lestur. Það vinnur gegn einmanaleika og manneklu. Við viljum að fólk geti verið heima hjá sér sem lengst en svo þurfum við að skoða hvort við getum byggt fleiri íbúðir eins og við Kirkjuveg í Keflavík, þar sem fólk hefur félagsskap hvert af öðru.“

Gunnlaugur segist að lokum klár í bæjarstjórastarfið ef kjósendur treysta honum: „Ég er bæjarstjóraefni Miðflokksins. Ég hef þekkingu, reynslu og brjálaðan áhuga á að gera vel og halda uppi krafti og gleði í bænum.“

Aukaspurningar úr prentútfáfu Víkurfrétta: 

Brennur fyrir málefnum bæjarins

„Ég hef brunnið fyrir málefnum bæjarins. Ég er fæddur og uppalinn hér, búinn að ala hér upp fjórar dætur og tekið þátt í öllum innviðum sveitarfélagsins. Mitt markmið er að þessi bær sé bærinn á Íslandi; staðurinn þar sem allir líta til og vilja vera og öfunda okkur. Mér fannst þetta ágætis tími, 49 ára gamall og búinn að fara í gegnum ýmislegt hér, og hugsanlega get ég bara komið og hjálpað til við að gera bæinn áfram góðan.“

Laga rekstur og fjölskylduvænt samfélag

„Okkar áherslur eru klárlega rekstur, yfirþyrmandi sprungnir innviðir sökum t.d. hælisleitenda, leik- og grunnskólar og sterkt atvinnulíf. Við viljum ræða stjórnsýsluna og svo íþrótta- og tómstundamál. Við viljum fjölskylduvænt samfélag og ábyrg fjármál. Þar sem við erum ný spyrjum við mikið „af hverju?“. Af hverju eru hlutirnir gerðir svona en ekki hinsegin? Málefnaskráin okkar þarf að vera dálítið fljótandi; hún á ekki að vera meitluð í stein því við eigum eftir að hitta fleiri fyrirtæki, hlusta og læra.

Hefur reynt á þolrifin

Hefur uppbygging skólamála haldið í við fjölgun íbúa?

„Þetta hefur reynt á þolrifin. Grunnskólar hér eru hannaðir sem 400 manna skólar en við höfum þurft að bæta við kálfum og stækka. Í Innri-Njarðvík var sérbýli breytt í fjölbýli sem gerði það að verkum að Stapaskóli er nú með þrjá 60 manna bekki í röð, sem er of mikið. Varðandi leikskólana þá er agalegt að biðlistar hafi farið í 2,8 ár. Markmiðið verður að vera að 12 mánaða börn komist beint inn á leikskóla eftir fæðingarorlof. Ég spyr líka: Voru allir grunnskólar fullir? Hefðum við getað verið með eina stofu með fimm ára börnum í grunnskólunum til að hjálpa til í stað þess að láta biðlistana vaxa svona?