SSS vill fjölga þekkingarstörfum og styrkja K64 fyrir árið 2030

Suðurnes verði leiðandi atvinnu- og þekkingarsvæði Íslands árið 2030, samkvæmt framtíðarsýn í atvinnuramma sem kynntur var á aðalfundi Sambands sveitarfélaga á Suðurnesjum, sem fram fór á dögunum. Þar eru menntun, nýsköpun, sjálfbær verðmætasköpun og græn orka sett í forgrunn.

Ramminn nær til áranna 2026–2030 og á að samræma vinnu sveitarfélaganna fjögurra þar sem hagsmunir þeirra fara saman. Hann kemur ekki í stað atvinnustefnu hvers sveitarfélags, samkvæmt kynningunni.

Markmið um fyrirtæki og störf á K64

SSS vill að KADECO og K64 gegni lykilhlutverki í uppbyggingunni. Í atvinnurammanum er stefnt að því að 50 til 100 fyrirtæki verði á K64-svæðinu árið 2030 og að þar verði 1.500 til 3.000 störf. Áhersla er meðal annars lögð á tengsl við háskóla og rannsóknir, nýsköpun og græna iðngarða.

Önnur markmið snúa að því að hækka menntunarstig, draga úr brottfalli úr framhaldsskóla og auka hlutfall starfa í þekkingar- og nýsköpunargreinum. SSS hyggst fylgjast með árangrinum með sameiginlegu mælaborði og árlegri framvinduskýrslu.