Skorar á atvinnurekendur í Reykjanesbæ að ráða ungmenni til starfa

Helga Jóhanna Oddsdóttir, íbúi og bæjarfulltrúi í Reykjanesbæ, hefur sent frá sér áskorun til atvinnurekenda í sveitarfélaginu þar sem hún hvetur fyrirtæki og stofnanir til að bjóða 16–17 ára ungmennum sumarstörf.

Í erindinu bendir hún á að þessi aldurshópur standi oft á milli skips og bryggju – of ungur fyrir flest almenn störf og of gamall fyrir vinnuskólann. Samkvæmt upplýsingum frá Tómstundamiðstöð Reykjanesbæjar eru um 50 ungmenni á aldrinum 16–17 ára án atvinnu í sumar, og hefur staðan sjaldan eða aldrei verið erfiðari.

„Iðjuleysi er mjög hættulegt þessum hópi,“ segir Helga Jóhanna og bendir á að félagsleg einangrun og áhættuhegðun geti aukist. Hún hvetur fyrirtæki til að bjóða jafnvel hlutastörf í nokkrar vikur og gefa þannig ungmennum tækifæri til vaxtar og þroska.

Laus störf má tilkynna beint til Helgu Jóhönnu, sem tengir ungmennin við atvinnurekendur – að eigin frumkvæði og ekki á vegum sveitarfélagsins.

[email protected]
Sími: 860-5212