Reykjanesbær kemur að útfararkostnaði Gunnars Þórðarsonar

Bæjarráð Reykjanesbæjar samþykkti á fundi sínum í gærmorgun að koma að útfararkostnaði Gunnars Þórðarsonar tónlistarmanns samkvæmt umræðum á fundinum. Ekki hefur verið tilkynnt um útfarardag.

Jafnframt var samþykkt að íslenski fáninn verði dreginn í hálfa stöng við allar stofnanir bæjarins á útfarardegi Gunnars til að heiðra minningu hans.

Gunnar fæddist á Hólmavík 4. janúar 1945 en fluttist ungur til Keflavíkur og varð einn af sonum Keflavíkur. Þar voru lögð drög að glæstum ferli hans og átti hann stóran þátt í því að bærinn hlaut viðurnefnið Bítlabærinn. Hann var sjálflærður að mestu en starfaði sem gítarleikari, söngvari, útsetjari, upptökustjóri og hljómsveitarstjóri. Hans verður þó einkum minnst sem eins ástælasta lagahöfundar þjóðarinnar en eftir hann liggja yfir fimm hundruð lög.

Ferill Gunnars var einstaklega fjölbreyttur. Hann sló í gegn með bítlahljómsveitinni Hljómum árið 1963 og var síðar í ofurgrúppunni Trúbrot, ásamt því að semja og spila með Ðe Lónlí Blú Bojs, Ríó Tríó og Lummunum. Hann kom einnig að stofnun Guitar Islancio og var hljómsveitarstjóri á Broadway til fjölda ára.

Gunnar braut ítrekað nýjan grundvöll; hann var fyrsti popptónlistarmaðurinn sem hlaut listamannalaun og fyrstur úr þeim geira til að hljóta inngöngu í Tónskáldafélag Íslands. Hann færði sig síðar yfir í stærri tónsmíðar, samdi kvikmynda- og leikhústónlist, kirkjumessur og hina vinsælu óperu Ragnheiði, sem sló aðsóknarmet hjá Íslensku óperunni.

Fyrir framlag sitt hlaut Gunnar fjölda viðurkenninga, meðal annars riddarakross hinnar íslensku fálkaorðu, heiðursverðlaun Íslensku tónlistarverðlaunanna og var útnefndur borgarlistamaður Reykjavíkur.

Gunnar lætur eftir sig eiginkonu sína, Sigrúnu Toby Herman, og fimm börn, en fjögur þeirra eru á lífi.