Reykjanesbær gerir alvarlegar athugasemdir við risavaxinn reykháf í Bergvík

Umhverfis- og skipulagsráð Reykjanesbæjar hefur tekið fyrir vinnslutillögu Suðurnesjabæjar að nýju aðal- og deiliskipulagi fyrir Bergvík. Uppbyggingin er liður í mótun K64 hringrásariðngarðsins í Helguvík og Bergvík, en ráðið gerir ríkar kröfur um umhverfisvarnir og lýsir yfir þungum áhyggjum af sjónrænum áhrifum fyrirhugaðra mannvirkja.

Risa-reykháfur myndi gnæfa yfir Reykjanesið

Í umsögn ráðsins er gerð alvarleg athugasemd við áætlaðan reykháf á svæðinu. Samkvæmt fyrirliggjandi skipulagsgögnum gæti reykháfurinn trónað í allt að 150 metra hæð yfir sjávarmáli. Ráðið bendir á að með slíkri hæð myndi mannvirkið breytast í helsta kennileiti Reykjanessins, sem því hugnast ekki.

Krefjast heilnæms umhverfis fyrir íbúa

Ráðið leggur ríka áherslu á að hvers kyns iðnaðaruppbygging á svæðinu verði að samræmast hagsmunum íbúabyggðar í Reykjanesbæ. Gerð er krafa um að starfsemin uppfylli ströngustu skilyrði um bestu aðgengilegu tækni (BAT) og fylgi lögum um hollustuhætti og mengunarvarnir. Hugsunin þar á bak við er skýr: tryggja verður íbúum í nágrenninu heilnæm lífsskilyrði og ómengað umhverfi.

Vilja samtal um vegi og skólp

Auk athugasemda við ásýnd og mengunarvarnir kallar umhverfis- og skipulagsráð eftir formlegu samtali og samvinnu á milli sveitarfélaganna tveggja. Óskað er eftir fundum um hvernig fráveitumálum á skipulagssvæðinu verður háttað, ásamt því hvernig vegtengingum á milli Reykjanesbæjar og Suðurnesjabæjar verður best stillt upp til framtíðar.