Nýr málefnasamningur í Vogum: Stefnt að gjaldfrjálsum leikskóla og Vogaappi

Bæjarfulltrúar D-lista (Sjálfstæðisflokks og óháðra), E-lista (Strandar og Voga) og L-lista (Lista fólksins) hafa undirritað málefnasamning um áframhaldandi samstarf í Sveitarfélaginu Vogum fyrir kjörtímabilið 2026–2030.

Nýi meirihlutinn ætlar að byggja á grunni síðasta kjörtímabils og leggur áherslu á traustan rekstur, skýra forgangsröðun og áframhaldandi uppbyggingu í opnu samtali við íbúa. Í samningnum er lögð rík áhersla á gagnsæi, vandað vinnulag og aukna stafræna þjónustu.

Hér eru helstu stórmálin og áherslurnar úr nýjum málefnasamningi flokkanna:

1. Breytingar í leikskólamálum og „Vogamódelið“

Mesta breytingin fyrir barnafjölskyldur snýr að útfærslu á svokölluðu Vogamódeli í leikskólamálum:

Stefnt er að gjaldfrjálsum 30 klukkustundum í leikskóla, að teknu tilliti til mönnunar, húsnæðis og fjárhagslegs svigrúms.
Hafður verður forgangur á fjölgun leikskólaplássa og undirbúning nýs leikskóla með ungbarnadeild.
Áfram verður unnið að uppbyggingu Stóru-Vogaskóla og samfellu á milli skólastiga.

2. Snjallvæðing og nýtt „Vogaapp“

Stjórnsýslan á að verða aðgengilegri og rafrænni. Unnið verður að innleiðingu á sérstöku Vogaappi, nýrri heimasíðu sveitarfélagsins og skýrari þjónustuviðmiðum fyrir íbúa og fyrirtæki. Í fjármálum er lögð áhersla á hallalausan rekstur og hóflegar álögur á íbúa.

3. Sjálfbær uppbygging, varavatnsból og Keilisnes

Meirihlutinn ætlar að tryggja að íbúðauppbygging verði í takti við innviði:

Lögð verður áhersla á úthlutun sérbýlislóða og fjölbreyttari húsnæðiskosti fyrir eldri borgara og fatlað fólk.
Styrkja á áfallaþol bæjarins með því að tryggja varaleiðir í vatnsöryggi og nýtt varavatnsból.
Í atvinnumálum verður áfram unnið að undirbúningi uppbyggingar á Keilisnesi, heildarskipulagi hafnarsvæðisins, fjarvinnusetri og stofnun nýrrar atvinnu- og nýsköpunarnefndar.

4. Frístundarúta, Voganeistinn og bætt umhverfi

Til að efla íþrótta-, tómstunda- og menningarlíf verður ráðist í nokkur ný verkefni:

Bætt verður aðgengi barna að tómstundum með því að taka upp frístundarútu og samgöngustyrki.
Stofnaður verður sjóðurinn Voganeistinn sem á að styðja við frumkvæði íbúa í menningarlífinu.
Sérstök notendaráð verða sett á laggirnar um málefni fatlaðs fólks.
Ráðist verður í sérstaka aðgerðaráætlun um fegrun bæjarins, fjölgun grænna svæða og betri leiksvæði í samstarfi við íbúa.

„D-, E- og L-listi ganga til samstarfsins með það að leiðarljósi að vinna saman af ábyrgð, krafti og góðu samtali fyrir íbúa Sveitarfélagsins Voga,“ segir í yfirlýsingu nýja meirihlutans.