Fyrirmyndarverkefni í skóla- og frístundastarfi heiðruð á afmæli Suðurnesjabæjar

Metnaður, sköpunargleði og fagmennska voru í fyrirrúmi þegar mennta- og tómstundasvið Suðurnesjabæjar veitti viðurkenningar fyrir framúrskarandi starf með börnum og ungmennum.

Þann 10. júní fór fram hátíðleg athöfn í Byggðasafni Suðurnesjabæjar þar sem Fyrirmyndarverkefni í skóla- og frístundastarfi sveitarfélagsins voru heiðruð. Athöfnin var haldin í tilefni af átta ára afmæli Suðurnesjabæjar, en þetta er annað árið í röð sem efnt er til þessara viðurkenninga.

Markmiðið er að varpa ljósi á það öfluga starf sem fram fer í leik-, grunn- og tónlistarskólum auk frístundastarfsins og hvetja til áframhaldandi nýbreytni og þróunar.

Harðsnúin dómnefnd valdi úr 16 tilnefningum

Alls bárust 16 tilnefningar sem sýna vel þann kraft og metnað sem einkennir starfsemi sveitarfélagsins. Óháð dómnefnd, skipuð þeim Fjalari Frey Einarssyni, Hrund Apríl Guðmundsdóttur og Írisi Dögg Hugrúnardóttur Marteinsdóttur, sá um það vandasama verk að velja úr tilnefningunum.

Fyrirmyndarverkefni Suðurnesjabæjar árið 2026 urðu þrjú talsins:

• Bræðingur (Gerðaskóli): Samþættingarverkefni sem byggir á nýbreytni, þverfaglegu samstarfi og hæfnimiðuðu námi.

• Heilsufræði á miðstigi (Sandgerðisskóli): Skapandi samþættingarverkefni sem tengir saman heilsueflingu, forvarnir og merkingarbært nám.

• Velferðarverkefni Gerðaskóla: Heildstætt verkefni þar sem áhersla er lögð á vellíðan, sjálfsþekkingu og félags- og tilfinningafærni nemenda.

Tónlist og fagnaðarlæti

Glæsileg tónlistaratriði frá nemendum tónlistarskólans og frístundastarfsins settu hátíðlegan svip á daginn. Eva Kristín Einarsdóttir söng og spilaði á gítar, kór eftirskólaúrræðis Gerðaskóla flutti tvö lög undir stjórn og gítarundirspili Alexanders Grybos, og Kristín Hrefna Ásmundsdóttir lék listilega á píanó.

„Viðurkenningarnar minna okkur á að á bak við öflugt skóla- og frístundastarf stendur hugmyndaríkt og metnaðarfullt starfsfólk sem leggur sig fram á hverjum degi,“ segir í tilkynningu frá mennta- og tómstundasviði, sem óskar öllum vinningshöfum og tilnefndum innilega til hamingju með glæsilegan árangur.