Mikil áskorun að taka á rekstri og byggja upp um leið

Guðný Birna Guðmundsdóttir, oddviti Samfylkingarinnar í Reykjanesbæ, hefur setið í bæjarstjórn undanfarin þrjú kjörtímabil. Í ítarlegu viðtali við Víkurfréttir fer hún yfir fjárhagslega endurskipulagningu bæjarins, uppbyggingu innviða, áskoranir sem fylgja því að vera ört vaxandi ferðaþjónustubær, samstarfið í meirihlutanum og hvort hún vilji verða næsti bæjarstjóri Reykjanesbæjar.

Áður en við komum að Reykjanesbæ, þá geri ég ráð fyrir að þú hafir verið á mikilli ráðstefnu Samfylkingarinnar um síðustu helgi. Þar eru þrjár setningar af flokksþinginu sem segja: „Samfylkingin hefur látið verkin tala í ríkisstjórn. Nú ætlum við að gera slíkt hið sama í sveitarstjórnum vítt og breitt um landið. Við viljum einfalda daglega lífið fyrir alla og gera það betra.“ Hvernig ætlið þið að gera það?

Það sem kom skemmtilega á óvart er að margar tillagnanna eru grunntillögur um hvernig Samfylkingin getur aðstoðað fólk við þetta daglega líf og amstur, sérstaklega þegar kemur að barnafólki og ungmennum. Við erum búin að gera fullt af þessum hlutum í Reykjanesbæ. Þarna eru tillögur eins og að börn og ungmenni fái frítt í strætó. Við erum með frístundastrætó hjá okkur sem við innleiddum um 2021 og það hefur meðal annars orsakað það að fjöldi barna á frístundaheimilunum hefur tvöfaldast. Þessi þjónusta er foreldrum gjaldfrjáls. Þetta er inni í gjaldinu þannig að gjaldið hækkaði ekki. Það kom skemmtilega á óvart hvað það var margt  sem við höfum þegar gert. Hugmyndafræðin á bak við þetta er að sveitarstjórnarmálin snúi meira að heimilunum, fjölskyldunum beint. Hvað getum við gert til að hjálpa þér og auðvelda þér lífið með einhverjum hætti?

Ef við förum aðeins inn á Reykjanesbæ og byrjum á stöðu sveitarfélagsins og bæjarsjóðs. Reykjanesbær hefur farið í gegnum mikla fjárhagslega endurskipulagningu á undanförnum 12 árum. Hvernig sérðu fjárhaginn þróast á næsta kjörtímabili og er rými fyrir stórar framkvæmdir eða jafnvel skattalækkanir?

Já, það er gaman að koma inn á það. Nú hefur umræðan verið svolítið stór og mikil varðandi fasteignaskattinn sérstaklega. En það sem við höfum gert núna, alla vega síðustu tvö kjörtímabil, er að lækka fasteignaskattinn. Við lækkuðum C-skattinn svokallaða í atvinnuhúsnæði úr 1,65 í 1,45%. En þetta hlutfall er í hámarki í nágrannasveitarfélögunum okkar. Þegar við berum okkur saman við önnur sveitarfélög er Hafnarfjörður náttúrulega langlægstur, enda mikil atvinnustarfsemi þar. En þegar við horfum annað, Kópavog, Akureyri og Akranes, þá erum við mun lægri en þau sveitarfélög, þannig að við höfum gert vel þar. Getum við gert betur? Það er alltaf spurning hvers kjörtímabils fyrir sig eða hverrar fjárhagsáætlunar fyrir sig. Hvert er svigrúmið? Við þekkjum öll söguna okkar undanfarin ár og fjárhagsstöðuna og við höfum þurft að spara því miður lengi til þess að ná okkur á strik. Þannig að það er ofboðslega flókið á sama tíma og við erum að sjá um þúsund manns sem hafa flutt til okkar árlega undanfarinn áratug. Á meðan við höfum verið að vinna í að ná fjárhagnum af stað höfum við þurft uppbyggingu þannig að þetta eru búin að vera mjög flókin fjármál en við erum komin á mun betri veg. En það er búið að taka tíma, vissulega.

Nýr oddviti Sjálfstæðisflokksins sagði hér í viðtali á Víkurfréttum ekki alls fyrir löngu að hann vildi lækka fasteignagjöldin og teldi sig geta búið til meiri tekjur fyrir sveitarfélagið. Hvað segir þú um það?

Það er sérstakt. Ástæðan fyrir því að við rýndum þetta núna lengi og vel í fjárhagsáætlunargerð var að við lækkuðum skattinn úr 0,25 í 0,23%. Þannig að við sáum bil til að lækka og gerðum það. En sveitarfélög í grunninn eru með þrjá tekjustofna. Það er fasteignaskattur, útsvar og framlög úr jöfnunarsjóði. Þegar þú lækkar einn tekjustofninn, sem um leið hefur áhrif á jöfnunarsjóðinn, þá sé ég ekki hvernig það er tekjuaukandi. Þannig að ég skil ekki alveg pælinguna þar. Það sem við höfum rýnt í er að hvaða marki getum við lækkað álagningarhlutfall fasteignaskattsins, sem við höfum gert ítrekað núna undanfarin níu ár. Þannig að þegar við berum okkur saman við sambærileg sveitarfélög og sveitarfélög hér á Suðurnesjum, þá erum við langlægst. Þannig að þessi umræða er skrítin en að sama skapi þá hefur fasteignaskatturinn hækkað mjög ört undanfarin ár en það er líka bara út af því að við erum að byggja meira og hingað flytja þúsund manns á ári. Sveitarfélagið er að belgjast út mjög hratt og það skýrir þessa öru hækkun og vissulega er skatturinn hár. En við höfum engu að síður lækkað þetta jafnt og þétt undanfarin níu ár, eins og við getum miðað við reksturinn.

Hefur það áhrif á framlag úr Jöfnunarsjóði ef þið lækkið önnur gjöld en útsvar?

Ef við lækkum þann tekjustofn þá hefur það áhrif á tekjuframlag úr Jöfnunarsjóði. En útsvarið er í hámarki hjá okkur eins og hjá flestum öðrum sveitarfélögum á Íslandi. Þannig að það eru fáir að sýsla með þá prósentu. Þannig að þetta er aðallega: Hvað getum við komist á móts við með fasteignaskattinum? Það höfum við vissulega gert og jú, fólk er að borga háan fasteignaskatt hér en við erum að lækka hann eins og frekast er unnt miðað við rekstur sveitarfélagsins.

En að fjármálum bæjarfélagsins undanfarin 12 ár, þetta var stórt verkefni þar sem bæjarstjórinn ykkar var nánast í fullu starfi í fundarhöldum við það í nokkur ár. Ertu ánægð með hvernig til hefur tekist?

Heldur betur. Við eyddum fyrstu þremur árunum í endurskipulagningu. Við þurftum að setja á hærri álögur, straumlínulaga allan rekstur, við fórum yfir allan reksturinn alveg fram og til baka og það skilaði okkur á fínan stað. Við söfnuðum fyrir því sem við gerðum og tókum ekki lán í áratug. En núna finnum við að það er kominn þrýstingur til framkvæmda þannig að við höfum verið að fara í það jafnt og þétt eins og frekast er unnt núna undanfarin ár.

Hvað með stórar framkvæmdir?

Við verðum að fara í næstu grunnskólabyggingar. Við þurfum að halda áfram í uppbyggingu leikskóla. Við byggðum þrjá nýja leikskóla á kjörtímabilinu sem er fágætt í sveitarfélögum en nú sjáum við að það er að losna pláss og við sjáum að við náum öllum 18 mánaða börnum inn núna í ágúst og jafnvel yngri börnum. Við höfum pláss fyrir yngri börn. Þannig að það er blessunarlega horft til betri vegar þar. En við þurfum að fara að byggja, samt halda áfram í uppbyggingu leikskóla og við þurfum að fara að byggja næsta grunnskóla. Það liggur alveg við.

Hvar verður hann?

Hann verður annaðhvort í Hlíðarhverfi eða á Ásbrú og eflaust þurfum við að fara að hefjast handa við báða. Hverfin okkar stækka mjög hratt. Við þurfum að klára Stapaleikskóla. Hann verður 120 barna leikskóli. Svo erum við að fara af stað með gamla Garðasel. Hann verður rifinn og byggður nýr í staðinn, sem rúmar vonandi 120 börn.

Hvernig sjáið þið fyrir ykkur að manna nýja leikskóla? Ég veit um dæmi að þið náið ekki að manna allar deildir í nýjasta leikskólanum ykkar. Er þetta mjög erfitt verkefni?

Þetta er ekki búið að vera erfitt. Við höfum verið lánsöm miðað við höfuðborgarsvæðið að til okkar hefur leitað starfsfólk og meira að segja leikskólakennarar, þannig að við erum mjög þakklát fyrir það. Við höfum líka innleitt fullt af valmöguleikum sem eru til hagsbóta fyrir leikskólaumhverfið. Við höfum verið með ýmis úrræði sem við höfum innleitt á kjörtímabilinu en auðvitað er þetta alltaf áskorun og við viljum halda í faglegt starf leikskóla þannig að við séum að gera okkar besta þar. En það er líka varðandi efnahagsumhverfið, það er atvinnuleysi á svæðinu en vonandi vill fólk koma og vinna hjá okkur og prófa þetta frábæra starf. Auðvitað viljum við eins og frekast er unnt fá fagfólk í þessi störf. En það er okkar að byggja góðar byggingar og laða til okkar gott starfsfólk með góðu faglegu starfi og vona það besta. Við verðum bara að vera bjartsýn á það.

Úr því að við erum í skólamálunum þá þarf að spyrja út í endurbyggingar á eldri skólum, Myllubakka- og Holtaskóla og mygluvandræðin þar. Telurðu að þið hefðuð getað gert þetta öðruvísi? Heildarkostnaðurinn er talinn vera kominn í 10-12 milljarða.

Hann fer nálægt því, já. Við okkur blasti stórkostlegt vandamál, með tvo rakaskemmda skóla og spurningin var annaðhvort að rífa þá báða eða endurbyggja þá eins og við kusum að gera. Það þótti vera fljótlegra og kostnaðarminna fyrir samfélagið. Jú, jú, þetta er búið að taka sinn tíma en við erum ekki að drífa okkur að gera þetta vel. Ég vil bara vera alveg skýr með það að við viljum ekki stytta okkur leið og gera þetta á einhverjum hrakhólum. Við viljum að þetta séu frábærar skólabyggingar, heilsusamlegar og nýtist til framtíðar því við erum samhliða að stækka þær. Myllubakkaskóli verður 500 barna skóli þegar yfir lýkur. Við fjölgum um 150 börn. Við stækkum íþróttahúsið. Við erum að laga aðgengismál í Holtaskóla, bæta við lyftum. Við erum að bæta þar 80 börnum við. Þannig að jú, þetta tekur tíma, það má alveg gagnrýna það. En góðir hlutir taka tíma og við ætlum ekki að stytta okkur leið með því að gera þetta á handahlaupum, það gerum við ekki.

Var það reiknað út á sínum tíma hvort það væri ódýrara að rífa og byggja nýtt?

Já, þetta var ódýrara og þetta þótti skárri kostur. En svo er alltaf líka þegar þú ert með svona gömul hús að þá finnurðu oft eitthvað meira en við bara ákváðum að fara þessa leið. Þessum framkvæmdum mun ljúka á næsta ári að mestu leyti, nema lóðafrágangur  á Myllubakkaskóla. Við erum að klára hér frábærar skólabyggingar til framtíðar fyrir fleiri börn. Við erum að áætla að hverfin stækki og börnum fjölgi og að þetta verði heilsusamlegar byggingar fyrir fólkið sem er í þeim alla daga.

Hvað með gámaeiningarnar, eða „svíturnar“ sem losna þegar skólarnir klárast? Væri til dæmis hægt að setja þær á Garðaselssvæðið sem ódýrari lausn fyrir nýjan leikskóla?

Þetta er náttúrulega einn valmöguleiki, vissulega, en við höfum hug á að rífa og byggja hana upp samhliða. Við eigum talsverðar svítueiningar, nú eru þetta ekki gámar, þetta er viðurkennt húsnæði. En nú erum við með verkefni úti um allt, samfélag okkar er að stækka þannig að það er ákall í fullt af starfsemi hjá okkur að fá meira húsnæði. Núna erum við að kortleggja hvað við eigum mikið og hvað er að losna. Nú erum við að skoða hvert þær eiga að fara. Við nýtum þetta húsnæði til góðra verka. Ég bara hvet alla til að fara inn í. Þetta eru ekki frystigámar, þetta er með gluggum og hurðum og eru bara frábærar einingar. Ég meina, við höfum þurft að taka áskorunum hlaupandi með tvo grunnskóla. Þannig að þetta var góð ákvörðun á sínum tíma og hún er búin að reynast vel.

Það hefur lengi verið talað um að það vanti meiri fjölbreytni í atvinnulífið í Reykjanesbæ.

Það er bara hornsteinn okkar samfélags og þú sérð bara hvað hefur gerst á Fitjabrautinni hjá okkur. Þarna auglýstum við lóð og áhugasamir aðilar komu. Nú er þarna ein stærsta Krónuverslunin á Íslandi, stór Byko og stærsta Gæludýr.is í rosalega flottum verslunarkjarna. Ég er alveg sannfærð um að framtíðin liggi svolítið í verslun og þjónustu hér. Við erum fyrsta og síðasta stopp hjá alþjóðaflugvellinum þannig að fólk er farið að sjá tækifærin þarna. Nettó er t.d. að byggja nýja stórkostlega verslun við Reykjanesbrautina þannig að við eigum eftir að sjá meira af þessu, alveg hiklaust. Við vorum bara að búa til umgjörðina. Þá erum við með verkefni í bígerð um að stækka Njarðvíkurhöfn og setja inn nýjar atvinnulóðir út af því. Við vorum að kaupa kísilverið okkar til baka út af því að við viljum bara auglýsa lóðir og fá hingað fyrirtæki. Hér er frábær hafnaraðstaða, tíu mínútur á alþjóðaflugvöll, hér eru tækifærin.

Talandi um íbúafjöldann, getur þessi 60% aukning á áratug haldið svona áfram?

Við erum búin að segja í mörg ár, næst verður þetta 2 til 3% en við erum yfirleitt að horfa í 5% og upp úr. En það er líka gleðilegt að við erum þannig sveitarfélag að fólk vill flytjast til okkar. Við erum með frábæra leik- og grunnskóla og frábær ungmennafélög. Við erum ferðaþjónustubær og margir koma í störf tengd ferðaþjónustunni og flugstöðinni. Þetta er eðlilegt upp að vissu marki, en þetta er ofboðsleg fjölgun. Á sama tíma og við erum að auka hér innviði og við erum að ná okkur eftir fjárhagskreppu. Þetta er bara búið að vera flókið. Ég er búinn að halda svo oft að þetta komist í eitthvað jafnvægi en það hefur ekki gerst.

Núna er verið að tala um meira atvinnuleysi og áhyggjur í atvinnulífinu. Kemur þetta inn á borð til ykkar?

Já, auðvitað fylgist maður með hagkerfinu okkar og maður finnur að það er ákveðin kólnun í gangi og við höfum auðvitað áhyggjur af því. Þegar það verður aukning í atvinnuleysi, þá erum við hæst. Það hefur alltaf verið þannig. Við höfum verið að ýta á, eins og Vinnumálastofnun, að vera með sérstakt úrræði hér. Mér finnst svona gegnumgangandi að það sé ákveðin kæling núna. Vonandi verður hún til skamms tíma.

Það var umræða um framkvæmdir við World Class hótelbyggingu og fleira. Er full alvara á bak við þetta enn þá?

Já, já. Þeir eru stórhuga. Það sem við erum bara að rýna í núna er stærð verkefnisins. Það kom alveg fram á síðasta bæjarstjórnarfundi að þeir ætla að halda íbúafund og kynna sínar fyrirætlanir út af því að það er annað að vera með áætlun í skipulagsgátt og að sýna íbúum sem virkilega búa þarna í kring, þannig að við bíðum bara spennt eftir því.

Þú varst að taka fyrstu „skóflustunguna“ að niðurrifi kísilversbyggingarinnar. Hvernig tilfinning var það?

Það var ótrúlegt. Hún var jafn gleðileg og hún var sorgleg, fjárfestingin sem fór í þetta batterí á sínum tíma. Maður skildi á vissan hátt, atvinnumálin voru hér í ólestri og fólk vantaði vinnu, þannig að þetta var ákveðinn kostur. En bæði hvernig þetta gekk og bara hvað þetta er búið að vera í langan tíma núna, níu ár. Þannig að þetta er ofboðslega góður, svona ljúfsár endir, að nú sé bara búið að höggva á þennan hnút. Reykjanesbær getur farið að auglýsa þessar atvinnulóðir þegar niðurrifi er lokið og við fögnum því að heimafyrirtæki kaupi þetta og er líka stórhugað um atvinnuuppbyggingu á svæðinu.

Viltu útskýra samninginn við Reykjanes Invest?

Við höfum náttúrulega alltaf skipulagsvaldið en lóðin er mjög stór og við erum að kaupa efri part hennar. Þeir eiga enn þá neðri partinn. Vonandi getum við þróað eitthvað saman hvert í sínu lagi eða hvernig sem það fer. Aðalatriðið er að þessar byggingar, sem eru það fyrsta sem þú sérð þegar þú kemur til Íslands, fara niður og við ætlum að auglýsa þær til að fá spennandi fyrirtæki að setjast að í Helguvík. Það er aðalatriðið.

Verktakafyrirtækið Bygg hefur líka verið að byggja hér íbúðir og hús, mjög myndarlegar framkvæmdir. Hvernig hefur samstarfið við þá gengið?

Já, og er bara að búa til fallegt hverfi. Sammála því. Við erum með deiliskipulag svolítið þannig að við erum alltaf fyrsti staður og ef þetta fer út í eitthvað óeðlilegt þá eðlilega stoppum við það. Við erum ekki að byggja 20 hæða blokkir eða annað slíkt. En jú, við erum búin að komast til móts við öll fyrirtæki sem vilja vera hjá okkur og aðalatriðið er að við bara viljum byggja upp fallegan Reykjanesbæ. Við viljum vanda til verka, við viljum að hér sé umhverfið fallegt og um leið og það gerist, þegar þú skapar aðstæður til þess, þá koma fleiri.

Hvað með akademíureitinn? Er eining um þá framkvæmd?

Ég held að það sé alveg eining um uppbygginguna á reitnum, þannig séð. Ég veit að minnihlutinn hefur miklar áhyggjur af bílastæðamálum þótt þarna sé teiknaður bæði bílakjallari og mögulegt bílastæðahús. En það sem við höfum sagt er að þetta frábæra verkefni sem hefur verið í vinnu í nokkurn tíma er hægt að taka í áföngum. Þannig að við erum alveg á því að byggja upp, við getum farið með þetta í sex fasa, byggt upp einn og séð hvernig þetta kemur út og byrjað rólega. Það er það sem við höfum sagt. Það er enginn að fara að byggja upp allan reitinn á einu ári.

Þið sjáið fyrir ykkur huggulegan miðbæ?

Algerlega, einn af mörgum.

Málefni eldri borgara, hvernig finnst þér staðan þar eftir að nýja hjúkrunarheimilið var opnað?

Við vorum rosalega glöð að fá okkar frábæra hjúkrunarheimili, 80 rými, og tæmdum þar Hlévang út. En svo sér maður þetta stórátak í uppbyggingu hjúkrunarheimila hjá ríkisstjórninni sem er bara fínt. Það þurfti að fara í þessi mál, það er búið að vera raunfækkun hjúkrunarrýma undanfarinn áratug sem er skelfileg þróun. Þannig að það horfir til betri vegar þar en það breytir því ekki að það þarf að leysa vandamálin eins og þau eru í dag. 70 manns umfram eðlilega rúmgetu á Landspítalanum eru hættuleg á bráðamóttökunni þar. HSS er aftur orðið fullt af skjólstæðingum og við verðum að reyna að bregðast við þessu. Það er í vinnslu að það verði hjúkrunarheimili á Ásbrú með allt að 90 rúmum. Það verður bara ofboðslega gleðilegt þegar það raungerist út af því að við þurfum rými sem fyrst.

Þú nefndir að þið hafið aukið framlag til íþróttamála en Sjálfstæðismenn segja Reykjanesbæ vera langt á eftir miðað við sambærileg sveitarfélög.

Í byrjun á þessu kjörtímabili var framlag eða skatttekjur íbúa til íþróttamála um 6%, sem var bara mjög lágt. Við höfum á þessu kjörtímabili reynt allt hvað við getum til að hækka þessi framlög. Þau eru núna komin í 9,2% á sama kjörtímabili. Það er að auki 1,2 milljarður sem við höfum sett í íþrótta- og tómstundamál. Við höfum hlustað á ungmennin okkar. Þau vildu félagsmiðstöðvar inn í sína skóla þannig að við fjölguðum úr einni í fjórar. Við vorum að byggja nýja körfuboltahöll, Icemar-höllina okkar frábæru í Innri-Njarðvík, þannig að við erum vissulega að gera hvað við getum en aftur, þetta kemur alltaf að fjármögnun og bakgrunni okkar. Það er í eðli sínu mjög erfið áskorun að vera með þúsund manna aukningu á ári og skapa þess vegna þrýsting á innviði á meðan þú ert með næstlægstu framlög meðal landshluta á Íslandi. Allt þetta helst í hendur.

Hvað með útlendingamálin? Þið hafið ekki verið sátt við þá stöðu.

Reykjanesbær hefur verið með samninga varðandi samræmda móttöku núna um árabil en þeir samningar eru ekki til í dag þannig að við erum í rauninni ekki að sinna þannig þjónustu fyrir Vinnumálastofnun eða ríkið. Ósætti okkar og það sem við höfum ítrekað komið inn á var þegar að þessi ríkisstofnun fór að taka hér húsnæði á leigu fram hjá sveitarfélaginu í rauninni. Hér voru mest um 1.100 manns á vegum Vinnumálastofnunar utan samninga Reykjanesbæjar og þetta vorum við eðlilega mjög ósátt við. En þetta er orðið mun minna núna í dag. Þetta var mjög óþægilegt, svona ofboðslega stór þjónustuaukning á stuttum tíma og þetta fór fram hjá okkur. Þetta var ekki ákvörðun meirihlutans að fara þessa leið. Nú er Vinnumálastofnun að þjónusta þennan hóp, ekki Reykjanesbær. Við berum ekki kostnað af þessu.

Er enn þá mikið af útlendingum sem koma hingað eða vilja koma?

Mun minna en áður. Það síðasta sem ég heyrði var að hingað væru að koma karlmenn frá Úkraínu sem væru að leitast eftir störfum hér og stríðið er enn þá í gangi þar, þannig að það væri svona helsti hópurinn núna. En þetta mikla flæði sem var hér fyrir nokkrum árum er orðið mun minna.

Hvernig hefur samstarfið í meirihlutanum gengið?

Samstarfið hefur verið mjög gott. Á fyrsta kjörtímabili vorum við með Frjálsu afli en við höfum verið með Beinni leið allan tímann. Samfylking, Framsókn og Bein leið núna síðast. En samstarfið gengur bara vel. Maður finnur að það er samhljómur meðal okkar flokka um hvernig við lítum á málefni sveitarfélagsins. Þannig að jú, samstarfið hefur gengið mjög vel.

Ég er stolt af fullt af hlutum. Við höfum náð að reka Reykjanesbæ betur. Við höfum náð haldi á taumlausum útgjöldum sveitarfélagsins. Skuldir íbúa Reykjanesbæjar fóru úr 2,8 milljónum á mann í eina og hálfa. Þannig að ég er ótrúlega stolt af því að hafa verið í þessari frábæru uppbyggingu, að byggja þessa þrjá leikskóla á kjörtímabilinu út af því að við sáum bara að við urðum að gera það.

Hefurðu áhyggjur af því að Sjálfstæðisflokkurinn nái hreinum meirihluta á ný, Umbót, eitt framboða gekk til liðs við hann nýlega, og saman voru þau með 36,5% í síðustu kosningum?

Ég ætla bara að einblína á það að stækka Samfylkinguna og gera okkar flokk að þeim frábæra flokki sem hann er. Ég vil bara fagna því að hér er fullt af fólki sem vill starfa fyrir sveitarfélagið sitt og það kemur bara í ljós hvað kemur upp úr kössunum. Ég er stolt af okkar verkum undanfarin 12 ár.

Oddviti Framsóknar leysti bæjarstjóra af í veikindum hans og var starfandi bæjarstjóri. Var einhver stirðleiki vegna þess fyrirkomulags?

Nei, við breyttum bæjarmálasamþykkt þannig að formaður bæjarráðs myndi leysa bæjarstjóra af ef hann færi frá í lengri tíma, svo pólitískur fulltrúi væri við stjórnvölinn. Þetta var alveg skýrt. Við höfum unnið mjög vel saman; við erum ekki ólíkir flokkar í kjarnanum. Kjartan Már hefur staðið sig mjög vel og verið okkur mikill stuðningur, og hann kom sem betur fer aftur.

Er Guðný Birna bæjarstjóraefni Samfylkingarinnar eða mun Samfylkingin leggja til að ráðinn verði utanaðkomandi bæjarstjóri?

Sko, allir oddvitar núna eru bæjarstjóraefni nema annað sé ákveðið, það er alveg ljóst. En þetta er ekki forgangsmál hjá okkur, þótt vissulega taki Samfylkingin þann slag, um það embætti, þegar við komumst í meirihluta næst. Það hefur reynst okkur ofboðslega vel að hafa ráðinn bæjarstjóra undanfarinn rúman áratug. En þetta er ekki forgangsmál okkar að taka þetta starf. Við erum opin fyrir samstarfi við alla. Okkar aðalatriði er að reka áfram rekstrarhæfan Reykjanesbæ og efla þennan bæ fyrir íbúana okkar. Það er höfuðmálið.

Reykjanesbær varð til með sameiningu Keflavíkur, Njarðvíkur og Hafna árið 1994. Margir telja að nú sé lag á næstu sameiningu á Suðurnesjum en 2018 sameinuðust Garður og Sandgerði í Suðurnesjabæ. Hvað segir forseti bæjarstjórnar Reykjanesbæjar um að það verði frekari sameining, og Suðurnesjabær og eða Vogar eða bæði sameinist Reykjanesbæ?

„Auðvitað er langt skynsamlegast að sveitarfélög sem liggja hlið við hlið á þessu stóra vaxtarsvæði sem á svo margt sameiginlegt séu ein heild. Á endanum sé ég alveg fyrir mér að Suðurnesin verði ein heild og ein rödd. Það er hagkvæmara fyrir íbúa, ódýrara og það er sterkari máttareining fram á við. Hvenær það verður veit ég ekki hvernig ég ætla ekki að lofa neinu um það hér. Sameiningin 1994, þegar Keflavík, Njarðvík og Hafnir sameinuðust, hefur heppnast vel.“