Löður býður eldri borgurum í ókeypis bílaþvott á Fitjum

„Við höfum fengið mjög góðar móttökur á Suðurnesjum og það er ánægjulegt að geta gert eitthvað fyrir eldri borgara á svæðinu,“ segir Hörður Ingi Þórbjörnsson, rekstrarstjóri Löðurs en fyrirtækið býður eldri borgurum ókeypis bílaþvott í stöð fyrirtækisins á Fitjum í Njarðvík í júní og júlí.

Eldri borgarar í FEBS, Félagi eldri borgara á Suðurnesjum fjölmenntu í morgun, föstudag með bíla sína í fríþvott en Hörður segir að eftir fund með félaginu í voru hafi komið upp sú hugmynd að koma til móts við eldri borgara með því að bjóða þeim í frían þvott á morgnana kl. 8-10.

„Þetta er hugsað til að aðstoða eldri hópa sem eru óöryggir að mæta í þvott. Þetta er rólegur tími hjá okkur og því tilvalið að aðstoða þá sem vilja læra betur á þetta. Þetta er mönnuð stöð og starfsmenn taka á móti viðskiptavinum þegar þeir mæta með bílinn í þvott. Þetta tilboð er fyrir alla 67 ára og eldri en líka fyrir alla sem eru í FEBS,“ segir Hörður en félagsmenn þar eru frá 60 ára og eldri og gildir tilboðið til allra í FEBS, ekki bara 67 ára og eldri.

Kristján Gunnarsson, formaður FEBS segir samstarfið við Löður ánægjulegt og til fyrirmyndar. „Ég vona að okkar fólk nýti þetta tækifæri í sumar. Þetta er vel boðið hjá Löðri og við þökkum fyrir það,“ sagði Kristján eftir að hafa rennt bíl sínum í gegnum stöðina.

Hörður segir að stöðin sé mjög fullkomin en tveir starfsmenn taka á móti bíleigendum og leiða þá í gegnum stöðina, úða tjöruhreinsi yfir bílinn í byrjun og taka erfiða bletti áður en bíllinn rennur í gegn. Þvottaburstarnir eru af fullkomnustu gerð og rispa ekki lakkið á bílnum og þvotturinn tekur bara nokkrar mínútur.