Ljúka sorgarsögu með niðurrifi kísilverksmiðju

Reykjanes Investment hyggst hefja eina umfangsmestu framkvæmd fyrirtækisins til þessa, sem felur meðal annars í sér niðurrif kísilverksmiðju United Silicon í Helguvík, byggingar sem lýst hefur verið sem einni flóknustu sem reist hefur verið í Reykjanesbæ. Fyrirtækið segir verkefnið fela í sér verulega áhættu, en markmiðið sé að „ljúka þeirri sorgarsögu“ sem verksmiðjan hafi verið fyrir bæjarbúa og sveitarfélagið.

Framkvæmdin er liður í samningi sem bæjarráð Reykjanesbæjar samþykkti á fundi sínum 19. febrúar síðastliðinn, milli Reykjanes Investment og Reykjanesbæjar.

Í tilkynningu Reykjanes Investment segir að fyrirtækið sé stolt af því að taka þátt í að hreinsa til á svæðinu og telur að með góðu samstarfi sé hægt að byggja upp sterkt og stöðugt atvinnulíf í kringum höfnina í Helguvík.