Kalla eftir samgöngubótum til 100 ára og flýtingu á tvöföldun Reykjanesbrautar

Öruggar og öflugar samgöngutengingar eru forsenda þess að atvinnulíf og samfélag á Suðurnesjum geti haldið áfram að vaxa. Guðjón Skúlason, formaður Samtaka atvinnurekenda á Reykjanesi (SAR), brýndi þinggesti og stjórnvöld á Atvinnu- og framkvæmdaþingi Reykjanesbæjar til að mæta örum vexti svæðisins með því að skipuleggja innviði með 50 til 100 ára framtíðarsýn að leiðarljósi. Guðjón benti á að samgöngur á Suðurnesjum snúist ekki bara um daglegar ferðir íbúa heldur varði þær almannavarnir, öryggi ferðamanna og flæði verðmæta fyrir atvinnulífið allt.

Úrbætur á Reykjanesbraut, varaleiðir og efling ímyndar

Meginkrafa SAR í samgöngumálum er að flýtt verði framkvæmdum við að tvöfalda lokakafla Reykjanesbrautar frá Fitjum allt að Keflavíkurflugvelli, en Guðjón sagði óviðunandi að fullnaðarfrágangur brautarinnar ætti að dragast fram til áranna 2033–2034. Þá var sömuleiðis bent á nauðsyn þess að ráðast í bætur á Nesvegi, enda sé hann í núverandi ástandi ófær um að taka við þeim mikla umferðarþunga sem skapast ef Reykjanesbraut lokast.

Að lokum undirstrikaði Guðjón mikilvægi þess að tryggja trausta varaleið fyrir svæðið og greindi frá því að SAR vinni nú markvisst að því að tengja fyrirtæki á svæðinu saman og draga fram þau miklu tækifæri sem brenna í bæjarfélaginu.

Í spilaranum hér að neðan er upptaka frá þinginu.