Optical Studio
Optical Studio

Fréttir

The Retreat við Bláa Lónið hreppti Hospitality Design-verðlaunin
Páll Ketilsson
Páll Ketilsson skrifar
mánudaginn 10. júní 2019 kl. 12:21

The Retreat við Bláa Lónið hreppti Hospitality Design-verðlaunin

The Retreat í Bláa Lóninu hreppti aðalverðlaun Hospitality Design tímaritsins í flokki best hönnuðu lúxúshótela heims en verðlaunin voru veitt við hátíðlega athöfn í New York í fyrradag. Þetta er í 15. sinn sem þessi eftirsóttu hönnunarverðlaun eru veitt en yfir eitt þúsund innsend verkefni eða vörur bárust í keppnina en aðeins ríflega hundrað fengu tilnefningu.

 Á tæplega 40 ára útgáfsögu Hospitality Design hefur tímaritið skipað sér sess sem eitt virtasta fagtímarit heims. Í umsögn dómnefndar tímaritsins segir að hönnun The Retreat sé „fáguð og skeri sig úr öllu öðru.“

 Hrólfur Karl Cela, hjá Basalt arkitektum sem var eitt þeirra fyrirtækja sem kom að hönnun hótelsins, segir ljóst að sérstaða Bláa Lónsins; hraunið, mosinn og vatnið, skipi verkefninu þann sess sem það hefur öðlast, enda er öll áhersla lögð á samhljóm við þetta einstaka umhverfi sem er hvergi annars staðar að finna.

 The Retreat hefur fengið mikið lof fyrir hönnun, útlit og þjónustu og hlotið á annan tug verðlauna frá opnun í apríl í fyrra. Meðal verðlauna og viðurkenninga má nefna Time Magazine’s World’s 100 Greatest Places, Surface Travel Awards – Best Spa, Travel + Leisure: It List – Best New Hotels in the World, svo fátt eittnefnt.

 „Þetta er mikill heiður, og við erum stolt af því að vera hluti af teyminu ásamt Basalt, Eflu, Lisku, B&B Italia, Axor, iGuzzini.,” segir Sigurður Þorsteinsson hjá Design Group Italia. Þetta hefur verið löng og ánægjuleg vegferð með Bláa Lóninu og það hefur verið einstaklega ánægjulegt að vinna með fyrirtæki sem hugsar alltaf fram á við og hefur haft hönnun sem einn af leiðarvísunum í sinni vinnu.“

 „Við erum mjög ánægð með þessi verðlaun, þau eru enn ein viðurkenningin á þeirri uppbyggingu og þeirri þjónustu sem við höfum unnið að innan Bláa Lónsins síðustu misseri,“ segir Grímur Sæmundsen, forstjóri Bláa Lónsins.

Ljósmyndastofa Oddgeirs
Ljósmyndastofa Oddgeirs