Raddir unga fólksins í Reykjanesbæ

Snjalltæknin er komin til að vera og síminn er stór hluti af lífi barna, unglinga og fullorðinna í dag. Hann er tenging við umheiminn, en hann getur líka skilið fólk að. Börn og ungmenni eru með skýr skilaboð, þau eru þreytt á símastressinu og vilja meira rými til að vera þau sjálf. 

Á barna- og ungmennaþingi Reykjanesbæjar sem bar yfirskriftina - Verum örugg komu þessi skilaboð sérstaklega sterkt fram. Fulltrúar allra skóla bæjarins lögðu áherslu á að síminn sé oft að taka yfir bæði frítíma og félagslíf. Þau vilja minna af skjá og meira af samtali. Minna af samanburði og meira af vináttu. Minna áreiti og meira öryggi. Á þinginu lýstu nemendur því hvernig símar trufla einbeitingu í tímum og grafa undan samveru í frímínútum, ýta undir netáreiti og félagslegt óöryggi. 

Skólar víðsvegar um landið hafa tekið upp símabann í skólum og takmarkanir á símanotkun og reynslan þaðan sýnir meiri ró og öryggi, betri félagsleg samskipti, aukin samskipti augliti til augliti og minna áreiti. 

Börn og ungmenni í Reykjanesbær kalla eftir samræmi um símanotkun í grunnskólum sem er skýrt og sanngjarna fyrir alla, sveigjanleika þegar nemendur þurfa tæknina vegna sérþarfa, kennslu í ábyrgri nethegðun, fræðslu til þeirra og foreldra og forráðamanna þar sem öryggi og vellíðan er í forgangi. 

Skólarnir geta ekki gert þetta einir, samstarf heimilis og skóla er lykilatriði. Foreldrar eru fyrirmyndir og hafa mikil áhrif á hvernig börnin nota tæknina, hvenær hún er notuð og hvers konar mörk eru sett. Það er ekki nóg að setja boð og bönn að leggja símanum, börn læra fyrst og fremst af því sem þau sjá okkur fullorðna fólkið og foreldrana gera, ekki bara því sem við segjum. Skýr skilaboð og reglur heima við skipta þar miklu máli. Það er mikilvægt að foreldrar takmarki skjátíma barna sinna, ákveði skjálaus svæði t.d. matartíma, kenna ábyrgð og sjálfsstjórn á netinu, ræði opinskátt um upplifun og pressu á samfélagsmiðlum. Með því að taka höndum saman gerum við börnum, ungmennum og okkur sjálfum kleift að byggja upp öryggi og vellíðan, bæði í stafrænum og raunverulegum heimi. 

Svefninn er mikilvægur fyrir okkur öll og eitt það mikilvægasta fyrir betra jafnvægi og heilsu. Hvernig væri að dusta rykið af gömlu góðu vekjaraklukkunni og taka símana úr svefnherbergjunum, ekki bara hjá börnum og ungmennum heldur líka okkur fullorðna fólkinu. Það bætir svefn og minnkar þetta stöðuga áreiti. 

Við viljum öll að börnin okkar blómstri, félagslega, tilfinningalega og í námi. Til þess þurfum við að skapa umhverfi þar sem tengslin ráða för, ekki tæknin. Setjum öryggi og vellíðan í fyrsta sæti. Látum börnin og ungmennin okkar finna að við hlustum og að við bregðumst við. 

Reykjanesbær - Tökum áskorun barnanna okkar, bregðumst við og verum fyrirmynd fyrir unga fólkið okkar og gerum gott samfélag enn betra.

Díana Hilmarsdóttir,

foreldri, forstöðumaður í Björginni geðræktarmiðstöð Suðurnesja

Ólafur Bergur Ólafsson,

foreldri, verkefnastjóri barnvæns sveitarfélags hjá Reykjanesbæ og verkefnastjóri félagsmiðstöðva í tómstundamiðstöð Reykjanesbæjar.