Ég þarf að þakka nokkrum

„Ég þarf að þakka nokkrum á þessum tímamótum, sem eiga þátt í því að ég fæ Súluna og ég ætla að gera það hér í kvöld en það sem stendur upp úr frá mínum tónlistarferli er samveran með þeim sem maður hefur verið að spila með í gegnum tíðina,“ sagði Baldur Þórir Guðmundssonar en hann  fékk Súluna, menningarverðlaun Reykjanesbæjar fyrir árið 2025, afhenta í Bergi í Hljómahöll á fimmtudagskvöldið. 

Baldur Þórir Guðmundsson hlýtur Súluna árið 2025 fyrir ómetanlegt framlag sitt til tónlistarlífs Reykjanesbæjar og fyrir ötult starf við að halda tónlistararfi og tónlistarsögu svæðisins á lofti.

Baldur sagði á afhendingunni aðeins frá tónlistinni í lífi sínu en hann varð sextugur nýlega. Hann byrjaði snemma að handleika hljóðfæri enda sonur tónlistarhjónanna Rúnars Júlíussonar, rokkkóngs og Maríu Baldursdóttur en heimili fjölskyldunnar var oft kennt við nafnið Geimstein sem þau stofnuðu. Hann nefndi þau auðvitað fyrst í þakkarræðu sinni en Baldur flutti svo þrjú lög í Bergi og fékk vini og stórfjölskyldu með með sérá svið .

Súlan eru verðlaun sem eru veitt þeim sem hafa lagt sitt af mörkum til að auðga mannlíf og menningu samfélagsins með fjölbreyttum hætti og var þetta í tuttugasta og níunda sinn sem Súlan var afhent. Verðlaunagripurinn er silfursúla eftir keflvísku listakonuna Elísabetu Ásberg og vísar í sjófuglinn súlu í merki Reykjanesbæjar. Á merkinu rís upp hvít súla sem tákn um lifandi samfélag.

Með viðurkenningunni vill bæjarstjórn Reykjanesbæjar þakka fyrir það mikilvæga framlag sem í því felst að eiga fólk sem vinnur að uppbyggingu jákvæðra málefna og sem leggur af mörkum til að auðga mannlíf og menningu samfélagsins með fjölbreyttum hætti. Það er menningar- og þjónusturáð Reykjanesbæjar sem tekur ákvörðun um hver skuli hljóta viðurkenninguna, að undangenginni auglýsingu þar sem óskað er eftir tilnefningum frá íbúum.

Baldur hefur í áratugi verið einn af burðarásum tónlistar- og menningarlífs í Reykjanesbæ. Frá unglingsaldri hefur hann verið virkur í tónlist, jafnt á sviði sem á bak við tjöldin, sem hljóðfæraleikari, tónlistarstjóri, útsetjari og upptökustjóri. Hann hefur komið fram á ótal viðburðum, tónleikum og hátíðum, leikið við fjölbreyttar athafnir og spilað undir hjá fjölda söngvara á ferli sínum.

Hann hefur einnig gegnt mikilvægu hlutverki í upptöku og útgáfu tónlistar á Suðurnesjum, meðal annars í tengslum við Geimsteinsútgáfuna, þar sem hann hefur stýrt upptökum, útsett og unnið að útgáfu tónlistar með fjölmörgum listamönnum. Með því starfi hefur hann átt stóran þátt í að varðveita og miðla tónlistararfi svæðisins.

Baldur hefur jafnframt komið að skipulagningu og utanumhaldi tónleikahalds á svæðinu, meðal annars í tengslum við Ljósanótt og tekið á móti þúsundum gesta og sagt þeim fróðleiksmola og gamansögur úr rokkinu í Rokkheimi Rúnars Júlíussonar og í Rokksafni Íslands.

Framlag Baldurs Þóris Guðmundssonar til menningarlífs Reykjanesbæjar er víðtækt og hefur hann með starfi sínu átt mikilvægan þátt í að efla og varðveita tónlistararf svæðisins, ásamt því að hafa komið víða við í tónlistarlífi landsins.

Baldur með eiginkonu sinni, Þorbjörgu Guðnadóttur.

Geimsteins fjölskyldan hefur sankað að sér Súlum, en Rúnar Júll fékk hana fyrstur, 1999. Hér eru synirnir Baldur og Júlíus með Maríu móður sinni.