Mikilvægi sjúkraflutninga á Suðurnesjum

Sjúkraflutningar og gæði þeirra eru gríðarlega mikilvægir fyrir Suðurnesjamenn.

 

Í ljósi niðurskurðar í heilbrigðiskerfinu um árabil hafa sjúkraflutningar með alvarlega veika og slasaða einstaklinga frá Suðurnesjum og inn í Reykjavík aukist. Í kjölfar lokunar skurðstofa á Heilbrigðisstofnun Suðurnesja fyrir áratug er viðbúið að sjúkraflutningar sængurkvenna og nýbura hafi einnig aukist. 

 

Með stórauknum íbúafjölda og aukningu ferðamanna á útkallssvæði Brunavarna Suðurnesja (BS) og umsvifa á Keflavíkurflugvelli hafa sjúkraflutningar margfaldast síðastliðin ár. Frá árinu 2015 til 2017 hefur sjúkraflutningum fjölgað um rúmlega 40% og enn bætist við. Útköll á síðasta ári voru rúmlega 3070 en árið 2013 voru útköll rétt rúmlega 2000.

 

Við búum svo vel að eiga gríðarlega fjölhæfa og faglega slökkviliðs- og sjúkraflutningamenn í Brunavörnum Suðurnesja. Þeir hafa um árabil átt í góðu samstarfi við bráðamóttöku Heilbrigðisstofnunar Suðurnesja, lögreglu og björgunarsveitirnar á Suðurnesjum. Aðstaða þessara bjargvætta hefur þó lengi verið óviðunandi. Til stendur nú að reisa nýtt húsnæði fyrir Brunavarnir Suðurnesja. Slík áætlun hefur verið til staðar í áratugi en nú er loks gert er ráð fyrir að byggingaframkvæmdir hefjist síðar á þessu ári.  

 

Á síðustu 3 árum hefur rekstur BS stórbatnað undir forystu Samfylkingarinnar, tæki verið endurnýjuð og nýr slökkviliðsbíll verið keyptur sem kemur til landsins nú í sumar án allrar lántöku.

 

Okkur er annt um öryggi bæjarbúa og við viljum halda áfram að styðja og byggja upp Brunavarnir Suðurnesja.

 

X-S Samfélag í sókn.

 

Guðrún Ösp Theodórsdóttir,
skipar 5. sæti á lista Samfylkingarinnar og óháðra í Reykjanesbæ