Uppselt á fyrstu Heima í Höfnum tónleikana
Tónleikarnir Heima í Höfnum voru haldnir í fyrsta sinn á Ljósanótt þegar Magnús Einþór Áskelsson og Sara Lind Guðmundsdóttir buðu tónleikagestum í garðinn sinn í Höfnum. Hljómsveitin Hipsumhaps steig á svið og óhætt er að segja að frumraunin hafi tekist vel en uppselt var á tónleikana.
Gestir fjölmenntu til Hafna og rúmlega tvöfölduðu íbúafjölda þorpsins. Tónleikagestir skemmtu sér konunglega í einstöku umhverfi þar sem Hipsumhaps hélt uppi frábærri stemningu.
„Við erum eiginlega bara í skýjunum með hvernig þetta tókst. Það var ótrúlega gaman að sjá garðinn fyllast af fólki og finna stemninguna sem myndaðist. Við gætum ekki verið ánægðari með þessa fyrstu tónleika,“ segja Magnús og Sara Lind.
Hugmyndin með Heima í Höfnum var að bjóða upp á öðruvísi tónleikaupplifun á Ljósanótt og um leið fá fólk til að leggja leið sína til Hafna.
„Okkur langaði að gera eitthvað skemmtilegt hérna heima og sýna fólki hvað Hafnir hafa upp á að bjóða. Við vissum auðvitað ekkert hvernig þessu yrði tekið í fyrsta skipti, þannig að það að selja upp tónleikana og sjá hvað fólk skemmti sér vel fór fram úr okkar björtustu vonum.“
Frumraunin verður ekki sú síðasta. Magnús og Sara Lind eru þegar farin að horfa til næsta árs og undirbúningur fyrir næstu Heima í Höfnum tónleika er hafinn.
„Við ætlum klárlega að gera þetta aftur og jafnvel stærra.
Nú er bara stóra spurningin hver stígur á svið Heima í Höfnum 2027.“
