Una Steinsdóttir: Ævintýraleg árin í FS

Fjölbrautarárin voru hreint út sagt stórskemmtileg og ævintýraleg um leið. Ég var mjög virk í félagslífinu, hvort sem það var í stjórn nemendafélagsins, leikfélaginu, íþróttakappleikjum, ræðukeppnum o.fl. Það sem var samt eftirminnilegast voru allir þessir snilldarkennarar sem voru við skólann og þegar ég byrjaði 1982 var skólinn bara 6 ára, en maður upplifði sannarlega engan byrjendabrag, bara grósku, gleði og kraft. Allt eðalkennarar og eftirminnilegir. Ég hef í gegnum tíðina verið talsmaður og stoltur fyrrverandi nemandi Fjölbrautaskóla Suðurnesja. Skólinn hefur skilað af sér fjölbreyttum hópi einstaklinga út í lífið sem hefur látið taka til sín á öllum sviðum mannlífsins. Fyrir það ber að þakka og ærin ástæða til að fagna 50 ára afmælinu. Takk fyrir mig.