Soroptimistar Roðagylla heiminn

Þann 25. nóvember er alþjóðlegur baráttudagur Sameinuðu þjóðanna gegn kynbundnu ofbeldi, staðfestur í mannréttindayfirlýsingunni. Þann dag hefst árlegt sextán daga átak gegn kynbundnu ofbeldi. Átakið nær hámarki sínu mánudaginn 10. desember, á alþjóða mannréttindadaginn.

Roðagylltur litur er táknlitur alþjóðlegs átaks til að útrýma kynbundnu ofbeldi. Orange the World, notar appelsínugula litinn sem sameinandi lit í öllum sínum aðgerðum. Litur þessi táknar bjartari framtíð, lausa við ofbeldi gegn konum og börnum.

Soroptimistaklúbbur Keflavíkur hvetur fyrirtæki og stofnanir til þess að taka þátt í þessu mikilvæga baráttumáli með því til dæmis að roðagylla byggingu/-ar með appelsínugulu ljósi í þessa sextán daga.

„Tökum höndum saman um að binda enda á ofbeldi gegn konum, sem eru útbreiddustu, lífseigustu og mest skemmandi mannréttindabrot í heiminum í dag. Ofbeldið hefur áhrif á konur óháð aldri, bakgrunni eða menntunarstigi og bitnar á stúlkum og konum jafnt á internetinu sem utan þess,“ segir m.a. í tilkynningu frá Soroptimistaklúbbi Keflavíkur.