Magnús og Jóhann - aftur heim

„Við erum mjög spenntir að koma aftur heim og halda tónleika fyrir sveitunga okkar og aðra í þessum frábæra sal,“ segir Magnús Þór Sigmundsson, tónlistarmaður en hann og Jóhann Helgason sem er nokkurn veginn eins og fóstbróðir Magnúsar, halda sína fyrstu tónleika í aðalsal Hljómahallarinnar, föstudagskvöldið 3. mars kl. 20:00.

Fóstbræðurnir eru frá Reykjanesbæ, Magnús Njarðvíkurmegin en Jóhann Keflavíkur. Þeir hittust fyrst um tvítugsaldurinn. „Við kynntumst í skurði milli Njarðvíkur og Keflavíkur, hann að vinna fyrir Keflavíkurbæ og ég fyrir Njarðvík, báðir að moka með skóflu frá sínum bæjarhluta yfir í hinn. Við tókum tal saman og áttuðum okkur fljótt á að við ættum sameiginlegt áhugamál, tónlistina og skiptum skóflunum út fyrir gítarana. Fljótlega var ég kominn á æfingu með hljómsveitinni sem Jóhann var í því ég gat spilað sólóið í Kinks-laginu Tired of waiting for you. Ég var ráðinn og nafnið á hljómsveitinni breyttist í Nesmenn. Þessi æfing fór fram í gamla Krossinum en þar vorum við öllum stundum og í Stapanum, þess vegna er mjög mikið gleðiefni fyrir okkur að snúa aftur þar sem ræturnar liggja. Við höfum haldið tónleika í minni salnum, Berg, en þetta verða þeir fyrstu í sjálfum Stapasalnum. Þegar ég hugsa til baka þá get ég nánast fundið lyktina sem var í Stapanum á sunnudegi þegar við mættum til að æfa. Búin að vera böll bæði kvöld og lyktin var sambland af öllu djamminu sem hafði verið í gangi.“

Félagarnir hafa samið marga smelli saman í gegnum tíðina en einnig samið í sitthvoru lagi. Við hverju mega tónleikagestir búast á þessum tónleikum? 

„Við munum spila lög frá upphafi ferilsins árið 1972, til nýrri laga. Ég er að vinna að nýrri plötu núna, tek kannski eitt lag af henni en annars verður þetta þverskurður af okkar bestu lögum í gegnum tíðina, bæði það sem við höfum samið saman og í sitthvoru lagi. Við ætlum að gera þetta eins og við gerðum í gamla daga þegar við byrjuðum, vorum þá bara með sitthvorn gítarinn og spiluðum og sungum. Þetta verður nakið og persónulegt. Það eru engir aðrir tónleikar fyrirhugaðir en við tökum alltaf öðru hvoru eitt og eitt gigg, ekkert ákveðið en svo kemur alltaf eitthvað upp og þá skoðum við það. Við erum engin unglömb lengur, hlaupum ekki út um allar trissur eins og við gerðum þegar við vorum ungir. Við erum mjög spenntir að koma aftur heim og halda tónleika fyrir sveitunga okkar og aðra í þessum frábæra sal en ég er mjög ánægður með þetta hús, hvernig því hefur verið haldið við. Ég er smeykur við orðróminn um að það eigi að breyta einhverju, þetta hús geymir stóran hlut menningararfs okkar og ég vona innilega að húsið fái að lifa í þeirri mynd sem það er,“ sagði Magnús Þór að lokum.