Toppliðið vann í Garðinum
Víðismenn tóku á móti toppliði þriðju deildar karla í knattspyrnu, Höttur/Huginn, á Nesfisk-vellinum í gær. Leiknum lyktaði með sigri gestanna sem skoruðu tvö mörk þegar stutt var til leiksloka.
Það voru gestirnir sem voru meira með boltann en Víðismenn ógnuðu með hröðum sóknum. Fyrri hálfleikur var frekar jafn og ekkert mark var skorað.
Í seinni hálfleik fengu Víðismenn nokkur ágætis færi en náðu ekki að nýta þau. Reyndar skoruðu þeir eitt mark en það var dæmt af vegna rangstöðu. Höttur/Huginn refsaði svo með tveimur mörkum í lokin (79' og 89').
Víðir situr í sjöunda sæti deildarinnar eftir sex umferðir með átta stig.
Jóhann Páll Kristbjörnsson, ljósmyndari Víkurfrétta, var á leiknum og tók myndir sem má sjá í meðfylgjandi myndasafni neðst á síðunni.
Víðir - Höttur/Huginn (0:2) | 3. deild karla 12. júní 2021
