SportHiit hópur úr Reykjanesbæ tók þátt í Spartan

Þrettán manna hópur sem æfir saman í SportHiit, Sporthúsinu í Reykjanesbæ, tók þátt í Spartan-keppni sem haldin var í Hvar í Króatíu dagana 11. og 12. október. Spartan er krefjandi þol- og hindrunarkeppni þar sem þátttakendur hlaupa 5, 10 eða 21 kílómetra og takast á við fjölbreyttar áskoranir á leiðinni – meðal annars að klífa veggi, burðast með þunga hluti og synda í sjó.

Sara Stefánsdóttir náði einstöku afreki þegar hún lauk öllum þremur vegalengdunum og hlaut þar með svokallaða Trifecta, sem telst mikið afrek – ekki síst þar sem brautin í Hvar er þekkt fyrir að vera bæði löng og krefjandi.

Veður að keppnisdögunum var bjart og hlýtt, 22 stiga hiti og sól, sem var nokkuð ólíkt þeim aðstæðum sem keppendurnir eru vanir heima í íslenskum æfingasal. Hækkunin á brautinni var einnig talsverð og má líkja henni við göngu á Móskarðshnúka.

Hópurinn hafði æft saman undir handleiðslu þjálfaranna Árna Freys og Hafdísar Ýrar, þar sem lögð er áhersla á úthald, þol og styrk. Þjálfararnir hvöttu hópinn áfram á keppnisdagana og stuðluðu að frábærum árangri allra. Samstaðan var sterk og hvöttu þátttakendur hvert annað áfram uns allir náðu sínum markmiðum.

Eftir vel heppnaða ferð er hópurinn þegar farinn að skoða næstu Spartan-keppni. Áfangastaðirnir eru fjölmargir og áskoranirnar ólíkar – en spennandi fyrir þá sem sækjast eftir líkamlegu og andlegu ævintýri í útlöndum.