Rendeiro tryggði Keflavík fyrsta sigurinn
Melanie Rendeiro skoraði mark Keflavíkur gegn Þrótti í fyrsta sigrinum á þessu tímabili í Bestu deild kvenna í knattspyrnu. Þetta voru jafnframt fyrstu stig Keflavíkur á leiktíðinni.
Grindvíkingar léku við Aftureldingu í gær í Lengjudeild kvenna og þar voru það Mosfellingar sem höfðu sigur með einu marki gegn engu.
Keflavík - Þróttur 1:0
Talsverður vindur setti sitt mark á leikinn sem var frekar tíðindalítill framan og markalaust í hálfleik.
Í seinni hálfleik fór aðeins að lifna yfir leiknum og á 70. leit eina mark leiksins dagsins ljós. Þá tóku Keflvíkingar hornspyrnu inn í teiginn en Þrótturum tókst ekki almennilega að hreinsa frá og boltinn endaði hjá Melanie Rendeiro sem þakkaði pent fyrir sig með nettu skoti í markið.
Keflvíkingar voru aðgangsharðir fyrir framan mark gestanna og fengu færi til að tvöfalda forystuna en það tókst ekki. Þróttarar reyndu sitt ítrasta í lokin til að jafna og pressan var töluverð á Keflavík en vörnin hélt og að lokum var það mark Rendeiro sem skildi liðin að.
Keflavík og Þróttur höfðu vistaskipti á botni deildarinnar, Keflavík er með þrjú stig en Þróttur eitt.
Fleiri myndir Jóhanns Páls Kristbjörnssonar, ljósmyndara Víkurfrétta, eru í myndasafni neðst á síðunni.
Afturelding - Grindavík 1:0
Grindavík tapaði öðrum leik sínum í Lengjudeild kvenna á tímabilinu þegar þær grindvísku þurftu að lúta í gras fyrir Aftureldingu í Mosfellsbæ í gær.
Fyrri hálfleikur var markalaus en eina mark leiksins skoraði Harpa Karen Antonsdóttir fyrir Aftureldingu á 75. mínútu.
Keflavík - Þróttur (1:0) | Besta deild kvenna 25. maí 2024
