Vill ná fyrr til barna sem eru utan leikskóla

Reykjanesbær þarf að ná fyrr til barna sem ekki sækja leikskóla til að styrkja grunn þeirra fyrir grunnskólagöngu. Þetta var áhersla Ásdísar Ólafsdóttur, varabæjarfulltrúa Sjálfstæðisflokks, þegar hún tók í fyrsta sinn til máls á bæjarstjórnarfundi Reykjanesbæjar á dögunum.

Ásdís ræddi málið undir fundargerð menntaráðs og tók undir að verkefni væru fram undan í skólamálum. Hún sagði bæinn hafa fagfólk í fremstu röð en mikilvægt væri að ná fyrr til þeirra barna sem ekki væru komin inn í leikskólastarf.

Því fyrr sem það tækist, þeim mun betur væri sveitarfélagið í stakk búið til að mæta áskorunum síðar á skólagöngunni.

Ásdís lagði ekki fram útfærða tillögu eða tölur um fjölda barna utan leikskóla. Fjölmargir bæjarfulltrúar buðu hana velkomna á fyrsta fundinn og óskuðu henni góðs gengis í starfi.