Útihús við Merkines í Höfnum alelda í nótt
Allt tiltækt slökkvilið frá Brunavörnum Suðurnesja, ásamt lögreglu, var kallað að Merkinesi við Hafnir í nótt eftir að eldur varð laus í útihúsum.
Tilkynnt var um eldinn til Neyðarlínunnar þegar klukkan var um tuttugu mínútur gengin í tvö í nótt. Þegar fyrsti slökkvibíll kom á vettvang var útihúsið alelda og hrunið að hluta.
Fljótlega kom liðsauki slökkviliðsmanna á staðinn með tankbíl og annan dælubíl.
Slökkvistarf gekk greiðlega en slökkviliðsmenn bjuggust við að vera eitthvað áfram inn í nóttina að slökkva í glæðum.
Reykurinn frá brunanum var varasamur en asbest-klæðning var í húsinu sem brann og agnir úr asbesti eru krabbameinsvaldandi.
Íbúar í Suðurnesjabæ, bæði Sandgerði og Garði, fundu sterka brunalykt í nótt en vissu ekki að upptökin væru við Hafnir.
Þegar þessi frétt er skrifuð á fjórða tímanum í nótt liggur ekki fyrir hver eldsupptök voru. Útihúsin eru hins vegar gjörónýt eftir brunann.
Hér aðeins neðar á síðunni eru ljósmyndir sem Hilmar Bragi tók á vettvangi í nótt.
Útihús við Merkines alelda // 31. desember 2020
-2.jpg?width=96&height=72&mode=crop)
