Unnið að breytingum á reglum um Listamann Reykjanesbæjar

Menningar- og þjónusturáð Reykjanesbæjar hefur tekið til umfjöllunar drög að uppfærðum reglum um nafnbótina Listamaður Reykjanesbæjar. Megintilgangur breytinganna er að tryggja skýrari aðgreiningu á milli þessarar heiðursútnefningar og Menningarverðlauna Reykjanesbæjar, auk þess sem lögð er áhersla á að formfesta faglegt mat ráðsins á þeim tilnefningum sem berast.

Ráðið lýsti yfir ánægju með framlagðar hugmyndir og telur að nýja fyrirkomulagið muni styrkja umgjörð útnefningarinnar. Málinu hefur nú verið vísað til bæjarráðs Reykjanesbæjar til frekari afgreiðslu og endanlegrar staðfestingar á hinu uppfærða ferli.