Flugger
Flugger

Fréttir

Tilkynnt um eld í húsi í Hvassahrauni
Eldurinn logar í rusli í skóflunni inni á milli gáma í Hvassahrauni. Slökkviliðsmenn á tali við landeiganda. VF/Hilmar Bragi
Föstudagur 21. júní 2024 kl. 17:42

Tilkynnt um eld í húsi í Hvassahrauni

Slökkvilið Brunavarna Suðurnesja var kallað út um miðjan dag í það sem talið var vera eldur í húsi í Hvassahrauni á Vatnsleysuströnd. Slökkvibíll með fjórum mönnum var sendur á fyrsta forgangi frá slökkviliðsstöðinni í Reykjanesbæ á vettvang.

Tilkynning til Neyðarlínunnar var um mikinn reyk frá húsi á svæðinu. Þegar slökkviliðsmenn komu á vettvang gekk þeim í fyrstu erfiðlega að finna brunastað, enda var tilkynningin óljós. Í ljós kom að eldur logaði í rusli sem hafði verið safnað fyrir í skóflu að gröfu inn á milli gáma á svæðinu.

Bílakjarninn sumardekk 2024
Bílakjarninn sumardekk 2024

Landeigandi hafði safnað ruslinu í skófluna og hellt yfir eldsneyti og borið eld að. Þar sem einnig var eitthvað af vatni í skóflunni myndaðist mikill reykur sem steig til himins. Vegfarendur um Reykjanesbraut héldu því að eldur logaði í húsi á svæðinu.

Slökkviliðsmenn ræddu við aðila á staðnum en aðhöfðust ekkert frekar.

Slökkvilið Brunavarna Suðurnesja komið á vettvang í Hvassahrauni í dag.
Séð yfir byggðina í Hvassahrauni. Mikil umferð er um Reykjanesbrautina og þar hélt fólk að eldur logaði í húsi í byggðinni sem er þarna.