Suðurnesjabær býður út nýja stíga: Tekist á um fjárhagslega áhættu

Bæjarstjórn Suðurnesjabæjar hefur samþykkt að heimila útboð á tveimur nýjum göngu- og hjólreiðastígum í sveitarfélaginu. Um er að ræða stíga annars vegar frá Garði að golfskálanum í Leiru og hins vegar frá Sandgerði að tengingu við stígakerfið á Rósaselstorgi. Þrátt fyrir að breið samstaða sé um mikilvægi stíganna, greiddu fulltrúar Framsóknar atkvæði gegn tillögunni vegna óvissu um fjármögnun.

Í fjárfestingaráætlun ársins 2026 er gert ráð fyrir 160 milljónum króna til verksins. Meirihluti D, O og S lista leggur áherslu á að hönnun liggi fyrir og hafi verið rýnd af Vegagerðinni. Gert er ráð fyrir að Vegagerðin fjármagni helming kostnaðarins á móti sveitarfélaginu, en gengið verður frá formlegum samningi þegar tilboð liggja fyrir og endanlegur kostnaður skýrist. Til að brúa fjármögnunina mun sveitarfélagið nýta allt að 100 milljónir króna af handbæru fé og nýta skammtímafjármögnun þar til greiðslur frá Vegagerðinni berast.Fulltrúar B-lista Framsóknar, þeir Magnús Sigfús Magnússon og Anton Kristinn Guðmundsson, gerðu alvarlegar athugasemdir við málsmeðferðina. Í bókun þeirra kemur fram að þeir styðji uppbyggingu stíga sem slíka, en telji það óábyrga fjármálastjórn að bjóða út verk áður en samningur við Vegagerðina liggur fyrir.

Bentu þeir á að framlög Vegagerðarinnar séu háð árlegri endurskoðun, sem gæti skapað verulega óvissu um hvenær fjármunirnir skila sér til baka. Með því að hefja framkvæmdir án fastra trygginga frá ríkinu sé sveitarfélagið að taka á sig óþarfa fjárhagslega áhættu.

Tillagan um útboðið var samþykkt með sjö atkvæðum gegn tveimur atkvæðum Framsóknar. Niðurstöður útboðsins verða lagðar fyrir bæjarráð þegar þær liggja fyrir, ásamt tillögu um endanlega fjármögnun verksins.