Sjálfstæðisflokkur og Miðflokkur í Reykjanesbæ hafa náð samkomulagi um nýjan meirihluta

Sjálfstæðisflokkur og Miðflokkur hafa komist að samkomulagi um myndun nýs meirihluta í bæjarstjórn Reykjanesbæjar. Samkomulag þess efnis verður undirritaður í Vatnsnesi á morgun, fimmtudag kl. 17. 

Flokkarnir hafa átt viðræður frá því á sunnudagsmorgun og komist að samkomulagi um öll helstu atriði. Hverjir muni gegna stærstu embættum innan stjórnkerfis sveitarfélagsins, þ.e. bæjarstjóri, forseti bæjarrstjórnar og formaður bæjarráðs, verður kynnt á fundinum á morgun sem og fleiri atriði málefnasamnings.

Vilhjálmur Árnason hefur lýst því yfir að viðræðurnar hafi gengi vel en hefur ekki gefið það út hvort hann muni taka strax við sem bæjarstjóri en flokkurinn kynnti hann sem bæjarstjóraefni fyrir kosningarnar og því einungis spurning hvenær það muni gerast, ekki hvort.

Alla vega er ljóst að nýr meirihluti Sjálfstæðisflokks með fimm bæjarfulltrúa og Miðflokks með einn bæjarfulltrúa taka við stjórn Reykjanesbæjar á næstu dögum.