Nýtt mælaborð á að sýna fyrr hvernig börnum vegnar

Mælaborð grunnskólastarfs í Reykjanesbæ á að gera sveitarfélaginu kleift að fylgjast betur með námi, líðan og skólasókn barna. Mælikvarðar eiga að verða fullmótaðir vorið 2027 í samráði við skólastjórnendur.

Vilhjálmur Árnason bæjarstjóri sagði á fundi bæjarstjórnar Reykjanesbæjar starfshóp hafa kortlagt gagnalindir og lagt fram drög að mælikvörðum. Auk náms og líðanar verði horft til skólabrags, skólasóknar og mannauðs.

Hann sagði markmiðið að geta metið framfarir yfir tíma og brugðist fyrr við þegar þörf væri á. Mælaborðið ætti að styðja við uppbyggingu skólastarfs og ákvarðanir um næstu skref.

Samhliða er unnið að nýjum læsisramma. Bæjarstjóri sagði honum ætlað að stuðla að stöðugum framförum barna í máli og læsi með öflugri kennslu og stuðningi á réttum tíma.

Hann tengdi verkefnin við viðbrögð bæjarins við PISA-niðurstöðum. Upplýsingar úr mælingum ættu að nýtast í vinnu sem þegar væri hafin, fremur en að niðurstöður stæðu einar og sér.

Bæjarstjóri nefndi jafnframt að Íslenska æskulýðsrannsóknin sýndi jákvæða þróun í líðan barna í Reykjanesbæ. Hann fór ekki yfir einstakar tölur eða samanburðartímabil í umræðunni.