Hrafnar og álftir stráfalla í flensu

Alvarleg staða er komin upp hjá fuglastofnum á Suðurnesjum þessa dagana. Meindýraeyðir á svæðinu fær nú mörg útköll daglega vegna dauðra eða mikið veikra fugla sem hafa smitast af flensu.

Ragnar Guðleifsson, meindýraeyðir, hefur haft í nógu að snúast síðustu daga við að farga hræjum og sinna veikum dýrum. Hann hefur þegar sótt sjö hrafna sem urðu flensunni að bráð og fær að jafnaði tvö útköll á dag vegna álfta sem eru illa haldnar. Hann tekur sýni úr fuglunum sem eru send til greiningar í Reykjavík.

„Riða til og eru greinilega þjáðar“

Álftirnar hafa fundist jafnt í fjörum sem við tjarnir á svæðinu. Vegfarendur og lögregla hafa kallað Ragnar til þegar fuglar finnast annað hvort dauðir eða rænulausir af veikindum.

Einn vegfarandi sem ræddi við Víkurfréttir lýsti átakanlegri sjón: „Álftin riðaði öll til og það var augljóst að hún var mikið þjáð.“

Hvar eru snjótittlingarnir?

Samhliða fréttum af flensunni hafa íbúar í Reykjanesbæ tekið eftir breytingum á fuglalífinu í görðum sínum. Óvenju fáir snjótittlingar virðast vera á ferli þennan veturinn og eru það aðrar tegundir sem gæða sér á fóðrinu sem íbúar setja út. Óvíst er hvort þetta tengist veikindum eða öðrum náttúrulegum sveiflum.

Dúfunum fjölgar þrátt fyrir allt

Þótt sumar tegundir eigi undir högg að sækja, virðist öðrum farnast vel. Dúfustofninn á Suðurnesjum virðist vera í mikilli sókn og sjást nú stórir hópar þeirra, meðal annars við Stapann í Innri-Njarðvík.