Fjölbrautaskóli Suðurnesja bætist við í hóp UNESCO-skóla
Í vikunni bárust þær fréttir að Fjölbrautaskóli Suðurnesja hefði fengið viðurkenningu sem UNESCO-skóli. Þar með eru 4 skólar innan Reykjanes jarðvangs orðnir UNESCO-skólar; Stóru-Vogaskóli í Vogum var fyrstur til að hljóta þessa viðurkenningu vorið 2025, Háaleitisskóli á Ásbrú fylgdi þar fast á eftir í lok sumars og Leikskólinn Gimli í Reykjanesbæ fékk sína viðurkenningu í október 2025. Frá þessu er greint á vef Sambands sveitarfélaga á Suðurnesjum.
Af þessu tilefni afhenti Sigrún Svafa Ólafsdóttir, verkefnastjóri fræðslumála hjá Reykjanes jarðvangi, öllum nýjum UNESCO-skólum innan jarðvangsins, bækurnar Reykjanes I og II, ásamt öðru útgefnu efni jarðvangsins sem getur nýst í verkefnavinnu um náttúru og menningu í nærumhverfinu.
Frá fyrsta kynningarfundi verkefnisins í september 2024 hafa um 18 leik-, grunn- og framhaldsskólar unnið að UNESCO-skólaumsókn innan Reykjanes jarðvangs. Ferlið hófst að frumkvæði Suðurnesjavettvangs og verkefnastjóri fræðslumála hjá Reykjanes jarðvangi hefur haldið utan um verkefnið, sinnt stuðningi við skólana og verið tengiliður við Félag Sameinuðu þjóðanna á Íslandi.
UNESCO hefur starfrækt samstarfsnet skóla á alþjóðavísu frá árinu 1953 undir nafninu UNESCO Associated Schools Project Network (ASPnet). Þeir eru nú um 10.000 talsins og starfa í 180 löndum. Skólarnir eru á leik-, grunn- og framhaldsskólastigi og hafa allir skuldbundið sig til að flétta þemu Sameinuðu þjóðanna og vinnu með Heimsmarkmiðin 17 um sjálfbæra þróun inn í sitt daglega skólastarf.
Markmiðið með því að hvetja sem flesta skóla innan jarðvangsins til að fara þessa leið og gerast UNESCO-skólar var í upphafi hugsað til að auðvelda skólum að vinna með heimsmarkmiðin og auka aðgengi að sniðugum verkefnum, en ávinningurinn hefur einnig verið sá að auka tengingu skólanna við jarðvanginn ásamt því að skapa lifandi samvinnuvettvang fyrir skólafólk þvert á skólabyggingar, skólastig og sveitarfélög.
Næst á dagskrá eru UNESCO-skólamenntabúðir þann 2. febrúar í Gerðaskóla í Garði, þar sem allt skólafólk af öllum skólastigum er velkomið til að skoða og kynna sniðug verkefni. Við það tilefni kemur Sævar Helgi Bragason stjörnufræðingur í heimsókn með upplýsingar fyrir kennara um almyrkva sólar sem verður hægt að upplifa hér á Reykjanesi þann 12. ágúst næstkomandi.
Sigrún Svafa Ólafsdóttir og Karen Valdimarsdóttir, Leikskólinn Gimli í Reykjanesbæ.
Sigrún Svafa Ólafsdóttir og Jurgita Milleriene, Háaleitisskóli í Reykjanesbæ.
Sigrún Svafa Ólafsdóttir og Gísli Gunnarsson, Stóru Vogaskóli í Vogum.
Guðlaug Pálsdóttir, Kristján Ásmundsson, Guðbjörg Rúna Vilhjálmsdóttir, Sigrún Svafa Ólafsdóttir og Davíð Ásgeirsson, Fjölbrautaskóli Suðurnesja.
Efnið frá Reykjanes jarðvangi sem hver skóli fékk.
