Páll Axel með þúsund þrista
Fyrstur til þess að ná áfanganum
Grindvíkingurinn skotvissi, Páll Axel Vilbergsson, skoraði í gær sína þúsundustu þriggja stiga körfu í efstu deild í körfuboltanum, fyrstur allra. Páll Axel leikur um þessar mundir með Skallagrímsmönnum, en körfuna skoraði hann í tapleik gegn Snæfellingum á heimavelli. Í samtali við Karfan.is sagði Páll að tilfinningin hefði ekkert verið svo sérstök. „Þegar öllu er á botninn hvolft snýst þetta allt um sigur eða töp. Vissulega hefði verið gaman að ná þessum áfanga í sigurleik, en af því að það varð tapleikur er þetta ekki eins skemmtilegt,“ sagði grindvíska skyttan. Páll skoraði 16 stig í leiknum og þar af fjóra þrista.
Fyrstu þriggja stiga körfuna í efstu deild skoraði Páll Axel með Grindvíkingum árið 1995, eða fyrir tæpum 19 árum. Páll hefur skorað 1002 þriggja stiga körfur í 476 leikjum, sem gerir rúmlega tvo þrista í leik.
